DILI, STLTIMORLESTE.com – Semana nee Ekipa Tekniku Ministeriu Edukasaun (ME) ho Institutu Nasional Seguransa Sosial (INSS) no Komisaun Funsaun Publika (KFP) sei identifika profesores moras prelongada iha Munisipiu Manufahi.
Liafuan nee hatoo husi Diretor Nasional Rekursu Umanu iha ME, João Amaral ba jornalista STL iha nia knaar fatin Vila Verde, Kuarta nee (23/07/2025).
“Tuir lo-loos nee Manufahi nee ita lao ona, maibe agora daudaun nee kada linha Ministeriu hotu-hotu agora dadaun ita tama iha etapa ida tetu orsamentu, entaun husi parte diresaun hotu-hotu tenke hakmatek iha fatin hodi tetu lai orsamentu ba planeamentu 2026, ho ida nee mak provizoriamente Manufahi ami seidauk halao, maibe semana oin hanesan nee ami bele kontinua ona ba iha Munisipiu Manufahi,” nia esplika.
Nia hatutan, identifika ba profesores moras prelongada nee sira forma ekipa husi INSS, KFP inklui ME rasik, forma ekipa nee mak sei ba halo identifikasaun, tanba Munisipiu Likisa, Baukau no Manatutu remata ona.
Iha fatin seluk, Diretor Servisu Edukasaun Munisipiu Manatutu, Patricio da Cruz Quintao hatete, profesores neebe mak moras prelongada nee dadus haruka ba ona iha rekursu umanu nasional.
“Kona-ba ita nian profesores neebe moras prelongada nee ita haruka ona dadus ba ita nian rekursu umanu nasional ME nian, atu nunee bele haree asuntu Ida nee,” nia afirma.
(jac)
