DILI, STLTIMORLESTE.com – Estudantes husi Ensinu Baziku Filial (EBF) Fatumeta halo limpeza iha areador eskola, atu nunee bele evita lixu iha eskola.
Kestaun nee hatoo husi Koordenador EBF Fatumeta, José Manuel Pires ba jornalista STL iha nia knaar fatin Fatumeta, Kinta nee (24/06/2025).
“Agora daudaun ami nian estudantes sira mai iha eskola para limpeza deit sira fila ona uma, limpeza nee loron-loron kuaze mai halo jardin, depois ami nian eskola mos iha faze reabilitasaun pinta, maibe ita nian estudantes barak mak ladun mai ona eskola. Nee duni kada loron ami nian estudantes sira mai halo deit limpeza iha areador eskola nian, tanba ami la halo ezame, maibe ami halo deit avaliasaun ba ami nian estudantes sira,” nia esplika.
Nia dehan, estudantes sira aula normal nee sei halao iha loron 4 fulan Agostu, maibe dia 2 Agostu halo limpeza, depois dia 4 Agostu hahu aula normal ba estudantes sira hanesan baibain, durante nee sira halo limpeza depois estudantes sira halo limpeza tau lixu iha fatin neebe mak eskola prepara ona, tanba halo limpeza nee para evita lixu iha eskola.
“Ami nia lixu fatin nee ami prepara ona ida, tanba ami nian estudantes sira mos badinas atu limpeza iha eskola, nee durante iha aula normal mos ami halo loron-loron, tanba ami iha komitmentu katak, tenke servisu hamutuk para bele kontra lixu iha areador eskola, husu estudantes tau lixu iha fatin,” nia komenta.
Direitor EBC 10 Dezembru Komoro, Calistro A. Guterres, estudantes sira nee han merenda eskolar, maibe komunidade sira nee faan tan nasi kotak, husi ida nee mak aumenta lixu iha sira nian eskola, tanba estudantes sira han hotu la tau kotak nee iha fatin, estudantes sira halo limpeza iha eskola.
“Difikuldade neebe mak ami enfrenta primeiru mak konaba lixu, tanba kada tinan ami sempre halerik ba limpeza nee, liu-liu ami nian estudantes sira dader mai eskola tenke halo limpeza, primeiru komunidade sira halo negosiu iha areador eskola, segundu ami nian eskola besik merkadu, liu-liu sira neebe faan hahan iha eskola, ida nee bele aumenta lixu iha eskola,” nia haktuir.
(jac)
