BAUKAU, STLTIMORLESTE.com – Implementasaun Programa Merenda Eskolar ba faze terseiru nian iha Munisipiu Baukau sei kontinua fali iha loron 04 Agostu tinan nee.
Xefe Departamentu Parke Eskolar iha Servisu Edukasaun Munisipiu Baukau, Sabino Arlindo Ximenes hateten, implementasaun programa merenda eskolar faze terseiru iha Munisipiu Baukau hahu hikas hafoin orsamentu ba programa refere transfere ba konta bankaria Ekipa Jestaun Programa (EJP) iha loron 10 Julhu no loron 14 Julhu kontinua faze tein ba estudante sira iha nivel eskola, maibe programa refere lao too deit 18 Julhu no husi loron 21 too 31 Julhu nee programa refere pauza, tanba feriadu.
“Terseiru periodu ita kontinua fali iha dia 04 Agostu ba oin sei finaliza iha dia 15 Setembru loron efetivu ba 35 dias no orsamentu hamutuk US$ 484.997,10 ba estudante 32.993,” hateten Sabino ba STL iha knaar fatin Tirilolo Baukau, Kinta (24/07/2025).
Nia sublina, implementasaun programa merenda eskolar faze terseiru ba loron efetivu 35 neebe tuir kalendariu sei termina iha loron 15 Setembru tinan nee, ho alokasaun valor orsamentu hamutuk US$ 484.997,10 sei responde ba estudante l 32.993 kompostu estudante husi pre-eskolar hamutuk 2.005 no restu estudante husi eskola ensinu baziku primeiru-segundu no terseiru siklu.
Nia fundamenta, husi total orsamentu neebe alokadu ba estudante ida hetan 0,42 sentavus kada loron kompostu osan Administrasaun 0,07 sentavus no Alimentasaun 0,35 sentavus ba kada estudu durante loron ida.
Programa merenda eskolar refere kontinua lao tuir mata dalan neebe lansa ona katak, hahan 25% husi produtu importadu no 75% mai husi produtu lokal neebe bele auguenta estudante sira nia estomuk hodi tuir prosesu aprendizajem ho diak.
“Objetivu prinsipal liu mak motiva oan sira nia estomak nunee tuir aulas nee kompletu. Dala ruma oan sira husi uma lao deit, too iha eskola 10 ou 11 oras sira kabun mamuk laiha ona vontade atu akompanha aula ho seriu, tanba hamlaha, tanba nee kria mekanizmu nee motiva estudante sira, aleide mos atu reduz ma-nutrisaun iha Timor-Leste,” Sabino argumentu.
Nia hateten, Ministeriu Edukasaun hanesan nain ba implementador programa merenda eskolar, neebe servisu hamutuk ho Dirasaun Servisu Agrikultura, Alimentasaun no Servisu Saude iha nivel Munisipiu neebe oferese ona kilo tetu todan estudante nian eskola sira iha Baukau, nunee observasaun jeral husi Servisu Edukasaun Bauka ba estudante sira husi eskola neebe Implementa programa merenda eskolar, volume estudante 95% hetan saude diak kompara ho tempu seidauk implementa programa merenda eskolar estudante pur-volta 60% afeta ma-nutrisaun iha Baukau.
Sabino konsidera, implementa programa merenda eskolar iha territoriu nasional liu liu iha Munisipiu Baukau iha vantajem boot, tanba bele reduz kazu ma-nutrisaun iha Baukau, nunee husu EJP sira kontinua implementa programa merenda eskolar tuir mata dalan neebe iha hodi hadiak liu tan saude labarik estudante sira nian.
Entertantu EJP neebe Servisu Munisipal Edukasaun Baukau estabelese hamutuk 30 resin kompostu Baukau Vila 14,Baguia 4,Laga 4,Kelikai 7, Vemasi 2 no Venilale 3.
(tom)
