BAUKAU, STLTIMORLESTE.com – Servisu Munisipal Edukasaun Baukau liu husi Departamentu Parke Eskolar husu entidades sira hatoo keixa bainhira hetan profesores no Ekipa Jestaun Programa (EJP) sira atu han hahan estudante nian neebe oferese liu husi Programa Merenda Eskolar (PME).
Xefe Departamentu Parke Eskolar iha Servisu Edukasaun Munisipiu Baukau, Sabino Arlindo Ximenes haktuir, regra husi manual programa merenda eskolar hateten, orsamentu 0,35 sentavus ba alimentasaun nee direitu kada estudante iha loron ida atu asesu merenda eskolar iha eskola, laos ba profesores, nunee bainhira implementasaun programa merenda eskolar lao mak profesores mos han, hahan husi programa merenda eskolar mak inspesaun hetan sei fo sansaun. Tanba nee laiha orientasaun ba profesores sira atu han hahan husi programa merenda eskolar.
Nunee bainhira profesores ida han hahan refere ho razaun EJP tein mak liu, nee argumentu deit, tanba kada loron foos neebe tein ba estudante sira kada estudante hetan 0,075 grama no item seluk sira tan EJP hatene ona kada loron tein kilo hira ba estudante sira iha eskola ida, neebe dehan tein mak liu nee laiha, tanba molok implementa programa refere parte EJP sira hetan ona formasaun no hetan mos formula tein nian atu ezekuta tuir mata dalan PME.
Mezmu implementasaun PME husi inisiu too ohin loron parte Edukasaun Munisipal seidauk simu keixa husi entidades sira kona-ba profesores no EJP han mos hahan husi programa merenda eskolar, tanba nee husu entidades sira bainhira hetan kazu hanesan bele hatoo keixa iha Servisu Munisipal Edukasaun Baukau.
“Mata dalan merenda eskolar nian ita profesores laiha direitu atu asesu mos ba iha merenda eskolar, nein EJP no profesores, karik iha eskola balun akontese nunee odamatan Edukasaun nakloke, se deit mak toman aktu nee fo informasaun ba Edukasaun,” Sabino rekomenda liu husi STL iha knaar fatin Tirilolo Baukau, Kinta (24/07/2025).
Mezmu nunee Xefe Departamentu Parke Eskolar nee garante, situasaun hanesan nee sei la akontese iha Munisipiu Baukau, tanba parte inspetor eskola hamutuk nain 10 resin neebe daudaun destaka iha baze hodi kontrola servisu sira.
Entretantu EJP neebe Servisu Munisipal Edukasaun Baukau estabelese hamutuk 30 resin, kompostu Baukau Vila 14, Baguia 4, Laga 4, Kelikai 7, Vemasi 2 no Venilale 3.
(tom)
