DILI, STLTIMORLESTE.com – Ministeriu Edukasaun (ME) halo ona pagamentu ba profesores 206 neebe mak koloka iha fulan Abril 2025, maibe 201 mak halo ona pagamentu no nain 5 iha faze segundu, tanba ho razaun duplika konta bankaria.
Lia hirak nee hatoo husi Diretor Nasional Rekursu Umanu iha ME, João Amaral ba jornalista STL iha nia knaar fatin Vila Verde, Sesta nee (25/07/2025).
“Ita nian profesores sira nee simu ona salariu ba fulan haat nian, nee halo pagamentu tiha ona, iha kolokasaun nee, pagamentu nee depois de relatoriu fulan tolu alista lista prezensa fulan tolu nian mak ita halo pagamentu, nee duni ita halo ona pagamentu ba fulan haat ninia, hahu husi fulan Abril mai too fulan Julhu, total ita nian profesores hamutuk 206, maibe ita halo pagamentu ba profesores 201, tanba nain 5 seidauk, tanba sira nian konta bankaria rua, tanba uluk servisu iha fatin seluk, entaun tenke halo kanselamentu mai para ita halo kanselamentu ida anterior nee,” nia esplika.
Tuir Diretor Rekursu Umanu nee katak, profesores sira nee koloka iha fulan Abril tinan 2025, bazeia ba iha kolokasaun iha Abril, bazeia lista prezensa kolokasaun inisial fulan tolu, fulan Julhu nee Ministeriu halo pagamentu ba sira 206 profesores, maibe 201 mak halo ona pagamentu no nain 5 sei iha pagamentu segundu, ho razaun tanba duplika Konta bankaria.
(jac)
