DILI, STLTIMORLESTE.co — iha loron Sesta (25/07/2025) Embaixador Uniaun Europeia (UE), Marc Fiedrich halao despedida ho Xefe Governu, Kay Rala Xanana Gusmão iha Palasiu Governu.
Hafon Despede ho Xefe Governu, Embaixador Marc Fiedrich ba jornalista sira iha Palasiu Governu, Sesta (25/07/2025) katak, ohin mai despede PM Xanana, tanba mandatu remata ona iha fulan ida nee, hafoin halao misaun durante tinan tolu iha Timor Leste (TL).
“Hau mai iha nee hasoru malu ho Primeiru Ministru (PM), Kay Rala Xanana Gusmão atu halo despedida, tanba hau nia mandatu hanesan reprezentante Uniaun Europeia iha TL sei remata iha semana oin,” Marc Fiedrich hateten.
Iha serimonia despedida nee, Embaixador relata ba PM Xanana kona-ba buat hotu neebe nia halo durante mandatu.
Iha oportunidade nee nia konsege halo diskusaun politika kona-ba importansia husi programa desentralizasaun no poder lokal iha TL ho nia natureza atu fo liu tan autonomia ba munisipalidade sira, koalia mos kona-ba diversifikasaun ekonomika, importansia husi dezenvolvimentu seitor agrikultura no ikus liu koalia kona-ba adezaun TL nian ba organizasaun rejional Association of Southeast Asian Nations (ASEAN) neebe sei sai hanesan membru plenu iha fulan Outubru tinan nee.
Durante tinan tolu iha TL, Marc Fiedrich observa katak TL iha hela faze dezenvolvimentu, maske hasoru difikuldade maibe sei sai diak liu iha futuru.
Responde perguntas jornalista kona-ba relasaun entre UE ho TL katak, lao kleur ona no kontinua metin iha futuru.
(jos)
