DILI, STLTIMORLESTE.com – Governu kontinua fó prioridade ba setór agrikultura hodi hasa’e produtividade, hametin seguransa ai-han no hadi’a rendimentu agrikultór sira nian.
Ministru Agrikultura, Pekuária, Peskas no Floresta (MAPPF), Marcus da Cruz, hateten katak prioridade ne’e hahú kedas iha IV Governu Konstitusionál no kontinua to’o agora.
Nia hato’o deklarasaun ne’e ba jornalista iha komemorasaun Loron Mundial Ai-han ba dala 45, iha Salaun Veteranus, Comoro, Dili, Sesta-feira (16/10/2026).
Marcus da Cruz esplika katak, prioridade Governu nian la’ós de’it atu aumenta produsaun agríkola, maibé asegura mós katak ai-han ne’ebé prodús bele to’o iha konsumidór nia meza.
“Agora la’ós de’it ajuda agrikultór kuda hare, maibé fó mós makina atu hasa’e produsaun.”
Nia dehan katak, Governu fó prioridade ba infraestrutura, inklui estrada no bee-moos, tanba fasilidade hirak-ne’e importante atu transporta produtu agríkola ba merkadu.
Nia husu mós ba sosiedade sivíl no organizasaun naun-governamentál (ONG) atu la’ós de’it ko’alia kona-ba agrikultura, maibé servisu hamutuk ho Governu no agrikultór sira.
Marcus esplika katak, parseiru dezenvolvimentu tenke ajuda muda hanoin agrikultór sira, hodi uza rekursu ne’ebé disponivel atu aumenta produsaun.
“Iha fatin balun, ita halo ona irrigasaun, maibé ema seidauk halo natar.”
Nia enfatiza katak, servisu hamutuk importante atu enkoraja agrikultór sira aproveita bee ne’ebé iha, la depende de’it ba udan atu kuda hare.
Nia mós enkoraja agrikultór sira atu halo natar dala rua ka tolu iha tinan ida, se bee disponivel no kondisaun rai permite.
Setór agrikultura, pekuária, peskas no floresta sai fonte importante ba ai-han, empregu no rendimentu família sira nian, liuliu iha área rurál.
Setór hirak-ne’e mós iha potensia atu diversifika ekonomia, dezenvolve empreza lokál no hamenus vulnerabilidade hasoru presaun ekonómika no mudansa klimátika.
Iha setór agrikultura, produtividade haree aumenta hosi tonelada 1,7 kada hektare iha 2005 ba tonelada 3,7 iha 2026.
Enkuantu produtividade batar aumenta hosi tonelada 1,3 ba tonelada 2,8 kada hektare, iha períodu hanesan.
Iha 2026, área kultivada haree atinje hektare 40.210, enkuantu área kultivada batar atinje hektare 43.876.
Governu kontinua halo esforsu atu asegura bee ba natar no enkoraja agrikultór sira kontinua aumenta produsaun ai-han.
Iha tinan 2026, produsaun modo atinje tonelada 26.304, enkuantu produsaun ai-fuan lokál atinje tonelada 10.700.
Maski iha progresu, produsaun doméstika seidauk natoon atu responde ba nesesidade nasionál, no Timor-Leste kontinua depende ba importasaun ai-han.
“Governu no parseiru sira kontinua hasa’e produtividade, hadi’a irigasaun no fasilita asesu ba insumu no teknolojia.”
Iha setór pekuária, dadus 2025 hatudu katak produsaun na’an karau no bibi hosi matadouru atinje tonelada 156.
Produsaun na’an fahi lokál atinje tonelada 120, enkuantu produsaun manu broiler atinje tonelada 366.
Iha setór peskas no akuakultura, kapturasaun ikan tasi atinje tonelada 7.718, enkuantu produsaun ikan hosi kolam no akuakultura atinje tonelada 3.360.
Rezultadu hirak-ne’e hatudu katak setór agrikultura, pekuária, peskas no akuakultura iha oportunidade atu aumenta disponibilidade proteína no diversifika dieta povu Timor-Leste nian.
(dom)
