DÍLI, STLTIMORLESTE.com – Ministériu Públiku akuza motorista inisiál JB kona-ba krime omisídiu neglijente, depois nia kareta lori foer nian sama labarik João iha Tibar.
Akontesimentu ne’e akontese iha loron 10 fulan Abril tinan 2026 tuku 12:20 meudia, iha área Lixeira Tibar, aldeia Fatunia, suku Tibar, Postu Administrativu Bazartete, Munisípiu Liquiçá.
Bazeia ba akuzasaun, arguido JB kondús kareta Mitsubishi FE74HD ho matríkula 55-310, hamutuk ho ajudante RM, atu lori foer husi restaurante ida iha Colmera ba fatin soe foer.
Ministériu Públiku alega katak, bainhira to’o iha fatin akontesimentu, arguido la haree iha espellu no la nota vítima ne’ebé tabele tuir kareta.
Vítima ne’e lakon nia kaer, monu ba estrada, no roda kotuk parte karuk kareta nian sama nia ulun. Vítima mate kedas iha fatin.
Iha audiénsia, arguido nega katak nia la haree vítima tabele iha kareta kotuk ka sente kareta kona vítima.
“Arguido la hare vítima tabele iha kareta kotuk no la sente kareta kona vítima.”
Arguido esplika katak, estrada ne’e nakonu ho kuak, nune’e nia kondús kareta neneik. Nia foin hatene kona-ba akontesimentu depois ema balu ho motorizada halai tuir no fó hatene katak kareta soke labarik ida.
Maski rona informasaun ne’e, arguido kontinua lori foer ba fatin soe foer. Bainhira fila, família vítima hein nia no halo agresaun, antes polísia to’o no lori nia ba Esquadra Polísia Liquiçá.
Sasin RM, ne’ebé servisu hanesan ajudante arguido, deklara katak nia la haree labarik tabele iha kareta nia kotuk.
Maibé, sasin konfirma katak ema balu ho motorizada halai tuir sira no informa katak kareta soke ema ida.
Depois soe foer, arguidu no sasin haree roda kareta, maibé la nota buat ruma hanesan ran. Tanba ne’e, sira hanoin katak la soke ema.
Tuir informasaun iha prosesu, patraun arguido nian halo akordu ho família vítima atu fó osan US$2.000 ba apoiu serimónia funeral.
Arguidu konfirma katak, akordu ne’e halo entre patraun no família vítima, la’ós nia rasik.
Depois rona deklarasaun arguido no sasin RM, tribunal adia audiénsia ba loron seluk atu rona sasin husi família vítima.
Prosesu ne’e prezide hosi juíz singulár Arjentino Nunes. Ministériu Públiku reprezenta hosi prokuradór Bartolomeo de Araujo, no Defensór Públiku Henrique Mariz fó asisténsia jurídika ba arguido.
Ministériu Públiku akuza arguido kona-ba krime omisídiu neglijente, ne’ebé previstu iha Artigu 140.º Kódigu Penál Timor-Leste.
(ter)
