BAUKAU, STLTIMORLESTE.com – Eskola Ensinu Baziku Filial Uaitonu iha Suku Builale, Postu Administrativu Ossu, Munisipiu Vikeke, sei menus sala aprendizajen ba estudante sira no menus profesores, tanba nee prosesu aprendizajen sira durante nee realiza ho metodu multi klase.
Koordenador EBF Uaitonu, Domingos Menezes esplika, EBF Uaitonu harii iha tinan 2001 neebe kada tinan akumula estudante husi primeiru anu too sestu anu, maibe iha deit sala aprendizajen ba estudante iha deit sala tolu no laiha edifisiu ba profesores sira inklui mos menus profesores, tanba inisiu too ohin loron profesores iha eskola Uaitonu nain tolu deit.
“Ami iha nee profesores nain tou deit iha klase neen, maibe sala de aula tolu deit inklui kartoriu ba profesores sira mos hamutuk ho sala de aula tolu nee hotu, entaun sala tolu nee sorin balun utiliza ba kartoriu ba profesores,” hatete Domingos ba jornalista STL liu husi telefone, Domingu (27/07/2025).
Nia konta, EBF Uaitonu estabelese no konstrui iha tinan 2001 inisiativa mai husi komunidade no iha tinan 2003 edifisu eskola refere hetan dezastre, tanba anin sobu, nunee hetan hikas konstrusaun foun husi programa pasta mutin iha tinan 2013.
Maibe konstrusaun nee rasik sala aprendizajen ba estudante nafatin too deit sala tolu no laiha edifisiu ba profesores sira. Nunee obrigadu parte eskola utiliza sala estudante sorin sai eskritoriu ba profesores sira no akumula estudante primeiru anu no segundu anu ba klase ida, terseiru anu no kuartu anu ba klese ida inklui kintu anu no sestu anu akumula iha klase ida hodi halao prosesu aprendizajen durante nee ho metodu multi klase.
“Ami uza deit maneira hanorin multi klase, laos turnu rua, se uza ba turnu rua ami profesores bele kastigu aan, entaun primeiru anu segundu anu sala ida, terseiru anu kuartu anu sala ida, kintu anu no sestu anu sala ida,” Domingos akresenta.
Nia deklara, metodu multi klase nee fo impaktu ba estudante sira durante prosesu aprendizajen tomak, tanba estudante klase rua tama hamutuk iha sala ida ho materia prosesu aprendizajen diferente, maibe obrogatoriu implementa metodu refere, tanba kestaun sala ba estudante no profesores menus.
Tanba nee husu Ministeriu Edukasaun atu responde preokupasaun refere nunee bele eleva kualidade edukasaun tuir planu nasional.
Enkuantu too notisia nee publika, STL seidauk hetan komentariu husi Diretor Servisu Munisipal Edukasaun Vikeke.
Entretantu estudante husi primeiru too sestu anu neebe rejistu iha eskola refere hamutuk 60 resin.
(tom)
