DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial CCS, tanba pratika krimi insendiu.
Iha sala julgamentu laran Juiz prosesu Jumiati Freitas lee sai akuzasaun katak, iha loron 03-10-2019, por volta 11h00 loron manas iha aldeia Brugbou, Suco Leimia Sorin balu, Hatulia, Municipio Ermera.
Iha data no oras refere arguidu CCS iha ninia plantasaun (ninia tos) hamoos no sunu rai hodi prepara atu kuda molok udan monu rai.
Iha tempu neeba rai maran, anin boot no aitahan no duut maran barak iha plantasaun arguidu nian no mos plantasaun lezadu sira nian.
Arguidu halibur tiha duut sira no ikus mai arguidu mos sunu, depois arguidu mos fila ba uma. Maibe momentu neeba anin makas hodi halo ahi han tutan ba lezadu sira nia plantasaun.
Kosekuensia husi nee, rezulta lezadu sira lakon kafe, vanila no mos ai-haan sira neebe mak sira kuda ona iha tos.
Tanba nee Ministeriu Publiku akuza arguidu komete krimi Insendiu neebe previstu iha artigu 273 husi Kodigu Penal.
Hatan ba akuzasaun neebe iha arguidu konfesa imparsial ba faktus, maibe arguidu ho lezadu sira sei relasaun familia tanba nee sira rejolve tiha ona.
Arguidu mos deklara, fo sala ona ba lezadu sira hanesan,Tais, fahi no osan.
Lezadu sira mos konfirma katak, sira rezolve ona problema nee, tanba nee sira mos hakarak atu prosesu nee bele taka fali.
Rona tiha ida nee Juiz prosesu hare katak, iha artigu 273 numeru 5 hateten katak, krime nee bele dada fila kunadu lezadu sira aseita.
Ho ida nee Prokurador no Defeza husu Tribunal atu omologa prosesu nee no ikus mai Tribunal deside hodi homologa prosesu refere, no absolve arguidu husi instansia.
Prosesu nee prezide husi Juiz Jumiati Freitas, Jose Gonsalves, Josr Quintao, Ministeriu Publiku Recardo Leite, arguidu hetan asistensia legal husi Defensor Publiku, Jose Maria Guterres.
(ter)
