DILI, STLTIMORLESTE.com – Tribunal Judisial Primeira Instansia Dili liu husi despaisu ikus ba prosesu Primeiru Interogatoriu, deside aplika medida Prizaun Preventiva ba arguida ho inisial FCR.
Arguida lori mai iha Tribunal, Ministeriu Publiku promove ho krimi Explorasaun Seksual neebe previstu iha artigu 164 husi Kodigu Penal Timor Leste nian.
Rona tiha arguida nia deklarasaun, ikus mai Juiz Turnu Fransisca Cabral deside hodi aplika medida Prizaun Preventiva ba arguida.
Tuir defeza husi arguida nian, Jose Maria Guterres dehan, nia parte la konkorda ho despaisu Tribunal nian, tanba nee sei halo rekursu hasoru despaisu nee.
“Hau sei halo rekursu ba iha Tribunal Rekursu (TR) hasoru despaisu nee, tanba hanesan defeza la aseita ho despaisu Tribunal nian,” dehan Jose ba STL iha Tribunal Dili, Segunda nee (28/07/2025).
Nia hatutan, iha alegasaun husi parte Ministeriu Publiku husu Tribunal atu aplika medida Prizaun Preventiva ba arguida. Maibe husi parte defeza husu atu aplika medida Aprezentasaun Periodika, no ikus mai Tribunal hare katak, atu labele iha kontinuadaun tan ba krimi iha futuru, Tribunal deside hodi aplika medida Prizaun Preventiva ba arguida.
Defeza esplika, arguida autoridade Seguransa detein iha flagarante Delito neebe deskonfia fasilita fatin atu halao atividade balu, hodi hetan osan benefisia ba nia aan. Maibe ida nee iha prosesu investigasaun mak foin determina lo-loos, iha duni ka lae konaba aktu nee.
Reforsa, hanesan defeza la aseita ho medida neebe Tribunal aplika ona ba nia klinte, tanba nee sei halo rekursu tuir prazu neebe iha. Tuir regra prazu ba iha rekursu sira durante loron 30.
Prosesu nee prezide husi Juiz Turnu Fransisca Cabral, Ministeriu Publiku reprezenta husi Prokuradora Bemvinda do Rojario, arguidu hetan asistensia legal husi Defensor Puliku Jose Maria Guterres.
(ter)
