BAUKAU, STLTIMORLESTE.com – Lakuwani triste kondisaun estrada iha area eis merkadu Vila Nova too iha area Kailara, Postu Administrativu Baukau Vila, tanba modelu estrada ba area remotas sira.
Habitante Kailaran, Raimundo de Sousa “Lakuwani” hateten, estrada nasional husi Munisipiu Baukau ba kapital Dili no ba Munisipiu Lautem diak ona neebe fo vantajen ba movimentu transporte publiku no privadu, enkuantu estrada urbana iha Munisipiu Baukau husi area Nagardo too rotunda Vila Nova no kontinua ba iha area Kailara, estrada kondisaun hanesan iha area remotas sira, tanba estrada aat.
“Ami triste loos kona-ba dalan, tanba dala iha Aeroporto ba Nasional nee diak ona, maibe husi Munisipiu mai iha nee, hanesan dala iha foho ninian,” hateten Lakuwani ba jornalista sira iha Kailara, Tersa (29/07/2025).
Nia sublina, ligasaun estrada husi area eis merkadu Vila Nova ba Kailara iha tempu Indonezia nahe ona alkatraun, maibe iha faze ukun aan, alkatraun sira neebe antes nahe kuaze nakloke no dadaun hela deit fatin fatuk.
Nia fundamenta, aliende mos medida estrada kloot difikulta movimentasaun transporte privadu sira hanesan fuzu no kamioneta no seluk sira, tanba estrada refere seidauk hetan reabilitasaun iha faze ukun aan.
“Indonezia halo mak nia bekas nee, agora ukun aan seidauk halo, mais afinal nee iha sidade Baukau, agora adarai tun ba iha Beskem Bundaran neeba agora aat ona, apalagi oituan nee, nee ita prezisa duni fo hanoin ba Governu halo netik estrada para ita uza,” Lakuwani akresenta
Habitante Kailaran nee husu Governu atual atu tetu politika no Orsamentu Jeral Estadu neebe aprova kada tinan hodi responde ba infraestrutura bazika neebe iha nivel Munisipiu, liu liu iha Munisipiu Baukau neebe dadaun kondisaun estrada iha Vila laran kontinua aat.
Enkuantu habitante eis merkadu Vila Nova, Raimundo da Silva Monteiro sente triste ho kondisaun estrada diresaun husi area eis merkadu Vila Nova ba Kailara inklui husi Vila Nova ba Vila Antiga, tanba kondisaun aat, difikulta movimentasaun ema ho transporte.
“Estrada nee aat liu difikulta kareta, nee prezisa hadia, tanba mikrolete dalam kota putar iha taman makam pahlawan tun mai iha nee, mais agora susar,” hateten Raimundo.
Maibe habitante nee iha esperansa, katak projetu reabilita estrada iha Baukau Vila sei akontese tuir planu neebe Autoridade relevante sira hatoo, tanba ekipa tekniku sira halo ona levantamentu dadus iha terenu no tuir planu estrada husi area eis merkadu Vila Nova too Kailara sei loke ba diresaun rua rin eletrisidade iha klaran.
Tanba nee husu Autoridade relevante sira atu implementa lalais projetu refere nunee bele fo satisfasaun ba transporte publiku no privadu sira iha Munisipiu Baukau husi seluk tan neebe sei asesu estrada refere.
Enkuantu observasaun STL nian iha terenu nota karak, estrada diresaun husi area eis merkadu Vila Nova too Kailara nuudar dalan alternativu neebe bele fo asesu ba movimentasaun husi Postu Administrativu Venilale inklui Munisipiu Vikeke, maibe dadaun kondisaun aat.
No observasaun seluk neebe STL nota iha estrada diresaun area rotunda Vila Nova ba too iha rotunda Nagardo Suku Bahu, Postu Baukau Vila oras nee kondisaun kontinua aat no grave, mezmu antes nee kompanhia lokal Roman Grigio Unipesoal Lda tenta atu halo manutensaun liu husi prosesu kee estrada kuaze remata ona husi area rotunda Vila Nova too ona iha area merkadu Munisipal Baukau ba objetivu atu cor hikas ho sementi atu fasilita movimentasaun transporte.
Maibe cor refere foin atinji deit parte sorin too deit iha area Hospital Rejional Eduardo Ximenes Baukau, enkuantu parte seluk kompanhia kee no seidauk cor too paradu ho razaun projetu reabilita estrada urbana Baukau Vila atu akontese, maibe too ohin loron seidauk implementa.
Entertantu liga asuntu nee, STL tenta komfirma Diretor Servisu Munisipal Obras Publikas Baukau, maibe laiha fatin atu fo komentariu, tanba sei tuir atividade servisu nian iha fatin seluk.
(tom)
