DILI, STLTIMORLESTE.com – Tribunal Judisial Primeira Instansia Dili halao julgamemtu ba arguidu (laen) ho inisial PC, tanba komete krimi hasoru lezada (feen) ho inisial EdFCG.
Iha faktus sufisiente katak, iha loron 25 fulan Abril tinan 2024, haleu oras 11:30 OTL, iha Kolmera, Dili, arguidu PC lori liman basa dala 4 ba ofendida.
Konsekuensia direta husi arguidu nia hahalok, ofendida hetan moras makaas iha kanuruk, ofendida sente tauk no prejudika tebes ofendida nia liberdade atu ba servisu nomos atu lao iha fatin publiku sira.
Kauza husi problema nee diskuti malu tanba osan.
Arguidu PC halo ho forma livre, deliberada no konsientemente, hatene katak.lori liman basa dala 4 kona iha ofendida nia kanuruk, nuudar meiu neebe aptu hodi hamosu ofensa ba lezada nia isin lolon no saude.
Arguidu hatene katak nia hahalok nee proibidu no punidu tuir lei penal.
Arguidu PC halo ho forma livre no ho propozitu konkretiza hodi utiliza espresaun neebe nia hatene katak, adekuadu hodi hamosu tauk ka la hakmatek ba lezada atu determina ninia aan.
Arguidu hatene katak, nia konduta nee proibi no punidu tuir lei penal. Tanba nee konstitui arguidu PC nuudar autor material ho forma konsumadu ba pratika konkursu krimi rua, krimi ofensa ba integridade fizika simples ho forma violensia domestika ida, previstu no punidu tuir artigu 145º hosi Kodigu Penal no artigu 35º hosi Lei Kontra Violensia Domestika n.º 07/2010, loron 07 fulan Julhu ho krimi ameasa ida previstu no punidu tuir artigu 157 hosi Kodigu Penal.
Rona tiha lezada nia deklarasaun, iha alegasaun ba prosesu refere Ministeriu Publiku reprezenta husi Prokurador Napoliao da Silva husu Tribunal atu aplika pena multa ba arguidu.
Enkuantu defeza Jose Maria Guterres dehan, husu Tribunal atu aplika pena neebe justu ba iha arguidu.
Rona tiha alegasaun, Tribunal deside adia hikas prosesu nee ba iha loron seluk hodi rona desizaun.
Audensia nee prezide husi Juiz Arjentino Nunes, Ministeriu Publiku reprezenta husi Prokurdor Napoliao da Silva, arguidu hetan asistensia legal husi Defensor Publiku, Jose Maria Guterres.
(ter)
