DILI, STLTIMORLESTE.com – Visi Primeiru Ministru no Ministru Koordenador Asuntu Ekonomiku no Ministru Turizmu no Ambiente, Francisco Kalbuady Lay konvida Prezidente Republika Jose Ramos Horta atu loke abertura kona-ba Bisnis Forum entre Timor Leste (TL) ho Australia, neebe sei realiza iha loron 6 fulan Agostu 2025.
Bainhira remata hasoru malu, Visi Primeiru Ministru no Ministru Koordenador Asuntu Ekonomiku no Ministru Turizmu no Ambiente, Francisco Kalbuady Lay ba jornalista sira iha Palasiu Prezidensial Nikolao Lobato, Tersa (29/07/2025) hatete, ohin mai hanesan Visi Primeiru Ministru nunee mos hanesan visi Koordenador Asuntu Ekonomiku mai hasoru Prezidente, iha asuntu rua mak mai relata.
“Iha asuntu rua mak hau mai relata ba Prezidente iha dia 6 Agostu iha atividade bolu naran Timor Leste ho Australia Bisnis Forum, entaun atu husu disponibilidade Prezidente nia loke konferensia nee iha tuku 6 kalan, nunee Prezidente konkorda ona ba hatoo diskursu iha kalan,” dehan Visi PM Kalbuady.
Asuntu seluk mak mai relata no kordena hela orariu neebe mak Prezidente sei ba vizita iha Japaun iha fulan Agostu nia laran, aleinde Prezidente lao ho nia servisu sira seluk, maibe iha dia 28 Agostu Timor Leste sei selebra dia nasional iha Osaka, iha feira Internasional iha Osaka.
“Hahu iha 28 too 29 Julhu loron rua nee ita selebra loron Nasional iha neeba, nunee mos relasiona loron boot neebe mak istoriku ita nia iha dia 30 Agostu loron referendum nia, iha programa lubuk ida mak hau hatoo prinsipiu Prezidente konkorda ona asuntu rua mak ohin loraik hau mai hatoo,” Katak Visi PM.
Visi hatete, iha dia 6 iha GMN halao iha kalan nee abertuta no dia 7 no dia 8 iha CCD diskusaun loron rua iha CCD no dader Primeiru Ministru Kay Rala Xanana Gusmao mak sei loke.
“Ita hatene katak bisnisman lubuk ida mai husi Australia, ida nee kooperasaun entre Timor Leste ho Australia, no Timor Leste nia parte mak Visi Primeiru Ministru Kalbady Lay hamutuk ho Embaixador Ketling embaixadora Australia nia,” katak Visi Primeiru Ministru.
(eme)
