VIKEKE, STLTIMORLESTE.com – Institutu Nasionál Kombate SIDA (INCSIDA) halao sosializasaun kona-ba Virus HIV ba komunidade iha Suku Uain Leten ho tema “Mai Ita Hamutuk Proteje Timor Leste (TL) Husi Problema Transmisaun Virus HIV”.
“Ami mai iha Uma Uain Leten hodi fahe informasaun kona-ba HIV-SIDA ba komunidade sira, liu-liu ba joven sira atu kuidadu aan no halo prevensaun ba moras HIV-SIDA,” hatete Prezidente Institutu Nasionál Kombate SIDA (INCSIDA), Daniel Marçal ba jornalista sira liu husi nia diskursu wainhira halao sosializasaun kona-ba HIV-SIDA nian iha Sede Suku Uma Uain Leten, Postu Administrativu Vikeke Vila, Munisípiu Vikeke, Tersa nee (29/07/2025).
Nia esplika, INCSIDA mai hodi fahe informasaun kona-ba moras HIV-SIDA ba komunidade Suku Uma Uain Leten, atu bele proteja Virus HIV nee, tanba daudaun nee numeru HIV-SIDA sae makaas.
“Ita prekupa tebes ba problema HIV-SIDA no aban ita sei halao tan sosializasaun iha Suku seluk maibe iha Munisípiu Vikeke nafatin,” nia deklara.
Nia hatutan, joven Uma Uain Leten presiza halo prevensaun bá moras HIV-SIDA, tanba estadu sei presiza sira, wanhira iha rekrutamentu presiza saude diak hodi servisu hodi halo dezenvolvimentu iha suku no munisípiu.
“Se ita kona HIV-SIDA ita labele servisu, tanba ema servisu ba estadu ida nee presiza saude diak, tanba nee joven sira tenke proteje aan husi moras nee, tanba imi mak nasaun ida nee nia futuru ba aban bairua nian,” nia koalia.
Iha fatin hanesan, Xefe Suku Uma Uain Leten, Martinho S. Gusmão informa, agradese ba INCSIDA tanba too ona mai iha Suku Uma Uain Leten hodi halao sosializasaun ba komunidade sira iha Uma Uain Leten.
“Ita nia komunidade sira bele komprende saida mak HIV-SIDA, tanba moras HIV-SIDA nee moras ida neebe hadaet husi ema ba ema, tanba oinsa maneira autoridade nia prontu atu fahe informasaun nee tutan ba komunidade sira nee ohin la mai partisipa,” nia deklara.
Nunee mos Komunidade Uma Uain Leten, Domingos da Silva koalia, antes INCSIDA Seidauk mai halo sensibilizasaun kona-ba HIV-SIDA, sira laiha liu informasaun kona-ba moras HIV-SIDA no oinsa halo prevensaun no tratamentu.
“Ami agradese tebes ba informasaun ida nee, tamba durante nee ami seidauk rona moras HIV-SIDA nee oho ema, no HIV-SIDA mak saida no karik kona oinsa halo tratamentu, maibe ohin ita nia nain ulun sira koalia klaru ona no ami komprede ona, depois ami kontenti tanba kazu HIV-SIDA nee iha ami nia Suku Uma Uain Leten sei zero, tanba nee ami mos husu nafatin para kontinua halo prevensaun bá moras nee rasik,” nia afirma.
(jen)
