DILI, STLTIMORLESTE.com – Prezidente Republika (PR), Jose Ramos Horta sente haksolok ho akordu Sesarfogu entre Tailandia no Kamboja Kona-ba konflitu iha Fronteira.
Iha loron Kuarta nee (30/07/2025) Prezidente Republika Demokratika Timor Leste no Laureadu Nobel ba Pas, José Ramos Horta simu ho laran haksolok anunsiu kona-ba akordu sesárfogu entre Reinu Tailandia no Reinu Kamboja, neebe prezide no organiza husi Malazia, hafoin eskalasaun foin lalais nee iha sira nia fronteira.
Prezidente Ramos Horta durante nee akompanha didiak situasaun nee, ho preokupasaun neebe klean no esperansa boot ba rezolusaun neebe lalais.
“Timor Leste konsidera tantu Tailandia hanesan mos ho Kamboja nuudar parseiru neebe kleur no hadomi iha ita nia rejiaun. Ami iha respeitu aas liu ba lideransa no povu hosi nasaun rua nee, no iha espíritu amizade no solidariedade rejional ida-nee maka Prezidente espresa ninia apresiasaun sinseru ba lideransa neebe hatudu husi governu rua nee hodi envolve iha dalan dialogu pasífiku no komprensaun mutua,” katak PR Horta.
Xefe Estadu hatete, akon vida, dezlokasaun ema sivíl sira nian no risku ba instabilidade luan liu iha rejiaun, sublina ona nesesidade kontínua ba envolvimentu konstrutivu.
Prezidente Ramos Horta elojia esforsu sira neebe halao ba iha Kuala Lumpur hodi halo mediasaun ba avansu ida nee, hanesan pasu dahuluk iha dalan ba rezolusaun ida neebe dura no pasífiku.
Rezultadu husi Enkontru Espesial neebe organiza iha 28 Julhu husi Malazia, nuudar Prezidente ASEAN, reflete espíritu no susesu loloos husi kooperasaun rejional bainhira hakbesik liuhosi dialogu nakloke no kompromisu konjuntu ba rezolusaun pasífika.
“”Nuudar fiar nain metin iha solidariedade rejional no orden global internasional, ami reafirma importansia hosi prinsípiu no mekanizmu fundador sira ASEAN nian – dialogu nakloke no harii konsensu – nuudar ferramenta esensial sira hodi navega dezafiu rejional sira neebe kompleksu. Nuudar ema Sudeste Aziatiku, ita tenke uza valor fundamental sira-nee hodi envolve iha kuadru dialogu nakloke no konstrutivu neebe tenke kaer metin iha momentu sira hanesan ida nee,” katak PR Horta.
Prezidente Ramos Horta komprometidu tomak ba espíritu ASEAN nian no forsa estadu direitu internasional nian, no ba responsabilidade koletiva atu prezerva pas no estabilidade iha rejiaun.
“Nuudar nasaun neebe envolve makaas iha rezolusaun konflitu pasífiku, ami repete ami nia prontidaun atu oferese kualker apoiu ba estadu membru ASEAN hotu-hotu no parseiru internasional sira hodi sustenta pas no harii hikas konfiansa,” katak nia.
Xefe Estadu hatutan, iha momentu krítiku sira nee, hotu-hotu tenke envolve ho boa fe no servisu kolaborativamente ba solusaun sira neebe dura. Timor Leste metin nafatin iha solidariedade ho nia vizibu sira, no ho ema hotu neebe hakaas aan ba mundu neebe pasífiku no kooperativu liu.
(eme)
