DILI, STLTIMORLESTE.com – Ministeriu Edukasaun (ME) husu ba Diretór Servisu Edukasaun Munisipál (SEM) sira atu verifika dadus estudante iha eskola ida-idak, liuliu númeru estudante finalista ne’ebé sei tuir ezame nasionál ba tinan 2026.
Sekretáriu Estadu Ensinu Sekundáriu Jerál no Ensinu Sekundáriu Tékniku-Vokasionál, Domingos Lopes Lemos, hato’o pedidu ne’e ba jornalista sira iha Sentru Imprensa Comoro, Sesta-feira (16/10/2026).
Domingos Lopes Lemos esplika katak, númeru estudante finalista ne’ebé sei tuir ezame nasionál tinan ida-ne’e tun kompara ho tinan kotuk. Tinan kotuk, estudante finalista ne’ebé tuir ezame nasionál hamutuk besik 56.000, maibé tinan ida-ne’e tun ba besik 51.000.
Nia dehan, situasaun ne’e presiza verifikasaun atu hatene razaun ne’ebé halo númeru estudante finalista tun, inklui posibilidade katak estudante balun sai husi eskola iha prosesu aprendizajen.
“Dadus ne’ebé ita foti ba tinan ida-ne’e mai husi eskola sira. Tanba ne’e, ita presiza haree didi’ak razaun ne’ebé halo númeru estudante finalista tun, no asegura katak lista ne’ebé ita prepara ne’e loos,” Domingos Lopes Lemos dehan.
Nia mós husu ba diretór eskola no superintendente sira atu kolabora hodi verifika lista prezensa no dadus estudante, atu evita inkonsisténsia iha rejistu estudante.
Tuir Domingos, verifikasaun ne’e importante atu asegura katak dadus ne’ebé eskola sira haruka ba munisipiu no depois ba nível nasionál reflete situasaun real estudante sira nian.
(jac)
