DILI, STLTIMORLESTE.com – Tuir komunidade husi Suku Maluro, Postu Administrativu Vikeke Vila, Munisípiu Vikeke katak, Timor ukun aan sira seidauk sente dezenvolvimentu iha sira nia Suku Maluro, tanba Liquefied Natural Gas (LNG) taka total dezenvolvimentu Suku.
“Ami komunidade iha Suku Maluro seidauk sente dezenvolvimentu, tanba programa ida LNG taka tomak dezenvolvimentu iha Suku Maluro, ami nia estrada aat nafatin,” hatete Komunidade Evazelino Ximenes ba jornalista STL iha Sede Suku Maloru, Segunda (27/07/2025).
Nia dehan, triste tebes tanba estrada Suku Maluro kontinua aat nafatin, tanba nee komunidade sira atu lori produtu lokal hodi asesu ba merkadu susar.
“Iha Suku Vizinhu sira agora asesu ona ba estrada no bee moos, maibe ami Suku Maluro saida mak dezenvolvimentu ami seidauk sente, tanba Governu uluk mai promete no Ekipa Interministeriál-Timor GAP Hahú Diskute Projetu Konstrusaun LNG, maibe too agora laiha rezultadu no ikus ami povu mak sai vitima ba dezenvolvimentu,” nia deklara.
Iha fatin hanesan, Komunidade Suku Maluro, Justino Menezes husu ba Governu labele mai promete katak Vikeke sei halo projetu planta Gas Naturál likefeitu ka Liquefied Naturál Gas (LGN) Beaco, iha Suku Maluro, Munisípiu Vikeke la lao, agora komunidade mak sai vitima.
“Uluk governu mai promete atu halao projetu LGN iha Suku Maluro, iha neebe too agora la lao, nee ami sai vitima ba dezenvoliventu durante tinan haat ona, ami nia Sede Suku mos kondisaun aat ona, ami labele hadia, estrada neebe kuaze tinan barak kondisaun mak hanesan nee, estrada aat nafatin, inan isin rua kuandu atu ba partus labele asesu ba sentru saude, tanba estrada aat,” nia informa.
Nunee mos Xefe Suku Maluro, Bendito Soares deklara, koalia kona-ba aspeitu dezenvolvimentu iha Suku Maluro mak tinan lima ona laiha dezenvolvimentu hanesan estrada neebe kontinua aat nafatin, tanba impaktu husi projetu LGN.
“Ita nia estrada mak ohin ita boot sira mai haree, estrada aat too agora, hau bele bele dehan dezenvolvimentu taka total ho projetu LGN, ami nia Sede Suku deit aat ona, ami labele hadia too agora no estrada mos labele hadia too hela agora,” nia afirma.
(jen)
