BAUKAU, STLTIMORLESTE.com – Konselhu Munisipal Kombatentes Libertasaun Nasional (KMKLN) Munisipiu Baukau sei fo konfiansa ba veteranu hamutuk nain 309, hodi hili estrutura KMKLN foun ba mandatu tinan 5 iha fulan Agostu tinan nee.
Prezidente Konselhu Munisipal Kombatentes Munisipiu Baukau, Fernando “Beredu’u” Gusmão hateten, segundu kongresu Munisipal ba Konselhu Munisipal Kombatentes iha Baukau sei realiza iha loron 11 too 12 fulan Agostu tinan nee, neebe sei hetan partisipante husi kongresista veteranu hamutuk nain 300 husi Postu Administrativu 6 iha Munisipiu Baukau no nain 9 husi estrutura Konselhu Munisipal atual.
“Segundu kongresu nee partisipante nain 300 husi Postu Administrativu 6 iha Baukau mak sei partisipa. Sira nebee mai partisipa 8a14 too 20a24,” hateten Beredu’u ba jornalista sira iha nia knaar fatin Vila Antiga Buakau, Kuarta (30/07/2025).
Nia sublina, kongresista ba segundu konferensia Munisipal nee maioria partisipa husi veteranu ho dedikasaun eskluzivu 8a14, 15a19 no 20a24, enkuantu veteranu neebe rejistu iha tinan 2009 seidauk hetan autorizasaun atu partisipa, tanba seidauk hetan rekonhesimentu husi Estadu Timor Leste.
Nia esplika, vantajen husi segundu kongresu Munisipal ba Konselhu Kombatentes Libertasaun Nasional neebe sei realiza iha Munisipiu Baukau, planu anivel Nasional neebe atu hili estrutura foun ba Konselhu Munisipal Kombatentes Munisipiu Baukau periodu tinan 5.
“Kongresu nee atu forma estrutura foun. Delegadu sira mai hili estrutura tuan ga estrutura foun, nee delegadu sira mak determina,” Beredu’u akresenta.
Eis kolaborador rejiaun 2, João Buka Tuir hateten, segundu kongresu Munisipal ba Konselhu Munisipal Kombatentes neebe sei realiza iha Munisipiu Baukau, parte veteranu barak hetan ona informasaun husi Konselhu Munisipal Kombatentes Munisipiu Baukau, tanba nee sei partisipa hodi hili estrutura foun ba mandatu tinan 5, maibe hili lider ida neebe solidu no haree ba aspetu dignidade Munisipiu Baukau.
“Ita hakarak hili lider solidu, lider akumulativu no lider ida neebe mak haree ba aspetu dignidade Baukau hanesan ita nia jerasional sira tenke akumula, ema sira neebe partisipa iha rezistente, joventude nia partisipasaun neebe ita hetan objetivu libertasaun nasional nee, ida nee ita tenke louva,” Buka Tuir espresa.
Buka Tuir katak, hanesan lideransa tenke akumulador ho rezistensia sira hotu, tantu husi joven too iha linha Frente Klandestina no seluk tan neebe luta ona ba Libertasaun Nasional, tanba nee segundu kongresu Munisipal ba Konselhu Munisipal Kombatentes Libertasaun Nasional neebe sei realiza iha Baukau, sei hili lider neebe hatene akumula ema hotu no la halo diskrimisaun inklui lider neebe la uza sistema familiarizmu iha prosesu trata Asuntu Kombatentes.
Buka Tuir planeia, iha segundu kongresu nee sei fihir lider ida akumulativu kompostu lideres sira neebe merese tuur iha banku Prezidente Konselhu Munisipal Kombatentes Munisipiu Baukau.
“Ita haree katak, ita nia figura primeiru Prezidente atual, segundu Komadante L7 no seluk tan mak ita fihir lider 24 anus iha ai-laran, maibe prezensa iha konferensia mak ita haree,” João informa.
Entretantu komisaun ba eventu segundu konferensia Munisipal nee, daudaun halo ona preparasaun karta konvite no sei distribui ba kongresista sira inklui konvidadu espesial atu partisipa iha eventu refere.
(tom)
