DILI, STLTIMORLESTE.com – Governu liu husi reuniaun Konselhu Ministru aprova ona projetu Dekretu-Lei ida atu kria Banku Nasional Dezenvolvimentu Timor Leste, SA (BNDTL).
Projetu dekretu lei nee aprezenta hamutuk husi Gabinetes Ministrus Planeamentu no Planeamentu Estratejiku, Ministra Finansas no Vise Primeiru Ministru no Ministru Koordenador Asuntus Ekonomikus.
“BNDTL hanesan instituisaun finanseira ida ho kapital publikus neebe esklusivu, ho personalidade juridika no autonomia administrativa, finanseira no patrimonial, neebe nia objetivu atu apoia investimentu produtivu no hasae kreximentu ekonómiku sustentavel país nian,” haktuir nota komunikadu neebe STL asesu husi Governu, Kuarta (30/07/2025).
Tuir diploma neebe daudaun nee aprova, BNDTL iha misaun atu kompleta falla merkadu nian iha asesu ba finansiamentu mediu no tempu naruk, promove solusaun adekuada ba nesesidade komunidade emprezarial timoroan, liuliu iha setor neebe konsidera estratejiku, hanesan agrikultura, industria transformadora, turizmu, infraesruturas no servisu sosial sira.
“Banku nee bele mos halao funsaun iha jestaun fundus estratejikus, tuir mandatu Governu nian, nunee asegura ninia sustentabilidade iha futuru no neutralidade orsamental,”
Diploma nee estabelese mos katak kapital sosial inisial neebe fiksa iha dolar amerikanu millaun 30, neebe Estadu mak subskreve tomak.
(alb)
