VIKEKE, STLTIMORLESTE.com – Komunidade Suku Fatudere, Postu Administrativu Vikeke Vila, Munisípiu Vikeke, halao teste raan hodi hatene sira nia estatus HIV-SIDA nian, tanba liu husi teste raan mak foin hatene rezultadu estatus HIV-SIDA pozitivu ou negativu.
“Ami komunidade iha Suku Fatudere foin primeira vez halo teste raan, liu husi teste raan mak ita foin hatene katak, iha ita nia isin nee pozitivu HIV ga negativu, se negativu agradese tanba livre husi moras HIV-SIDA, sei teste ba mak pozitivu ita tenke halo tratamentu,” hatete Xefe Suku Fatudere, Marito Gomes de Araújo ba jornalista STL iha Sede Suku Fatudere, Kuarta (30/07/2025).
Nia agrese tanba ho INCSIDA nia prezensa iha nee sira bele rona informasaun kona-ba moras HIV-SIDA no sira mós bele hasai raan hodi teste raan ba HIV-SIDA.
“Ho INCSIDA nia prezensa iha ami nia suku, ami bele rona informasaun kona-ba moras HIV-SIDA, tanba durante nee informasaun hanesan nee ami nunka mais hatene saida mak HIV-SIDA no hadaet liu husi saida, maibe ohin loke ona ami nia hanoin no ami bele hatene ona katak HIV-SIDA liu husi relasaun seksual livre, liu husi raan no husi oan ba inan,” nia esplika.
Iha fatin hanesan, Diretora Nasionál Promosaun, Prevensaun no Komunikasaun iha INCSIDA, Angelica soares da Costa Oliveira informa, husu ba komunidade Fatudere ba halo teste raan hodi hatene estatus HIV-SIDA, tanba liu husi tes raan mak foin hatene HIV-SIDA pozitivu ou negativu.
“Hau husu ba komunidade hotu bele ba hasai raan, atu nunee imi bele hatene imi nia estatus HIV-SIDA, tanba liu husi teste raan mak foin ita bele hatene ita nee pozitivu HIV-SIDA ou negativu, tanba kuandu ita halao relasaun seksual liu ema nain ida, yang jelas ita risku ona ba moras HIV-SIDA, diak liu ita hatene sedu para halo tratamentu duke hatene tarde,” nia afirma.
(jen)
