BAUKAU, STLTIMORLESTE.com – Komando Polisia Munisipiu Baukau prende kilat manu hamutuk 5 husi sidadaun nain 2 iha area Lekiloiwatu, Suku Triloka, Postu Administrativu Baukau Vila, Munisipiu Baukau.
Komadante Komando Polisia Munisipiu Baukau, Superintendente João Sancho Pires informa, kilat manu refere prende husi sidadaun nain 2 ho inisial IF no RS.
Iha loron 28 Julhu nee bainhira ho motor CRF sapa matrikula Y.8653 tula kilat manu refere faan ba sidadaun inisial A iha area Lekiloiwatu Suku Triloka, hafoin parte servisu intelejensia Polisia Baukau informa ba Komando Polisia no too kedas fatin hodi halo aprensaun ba kilat refere iha lokal akontesementu.
“Nee parte informador no sekreta sira mak buka tuir hetan iha Lekiloiwatu. Ema nain rua mak lori atu faan ba ida seluk hakarak pesan, iha tempu neeba ita nia Polisia too fatin kontaktu Polisia investigasaun asegura ema nee mai ita nia fatin,” informa João Sancho Pires ba jornalista sira iha knaar fatin Vila Nova, Baukau, Kinta (31/07/2015).
Nia sublina, hafoin parte Polisia Investigasaun too fatin halo kedas aprensaun ba evidente sira hanesan motor no kilat manu inklui evakua suspeitu nain rua husi area Lekiloiwatu hodi asegura iha edifisiu Komando Polisia Munisipiu Baukau no uma nain inisial A sai testamunha ba kaze refere.
Nia fundamenta, durante prosesu investigasaun lao iha edifisiu Komando Polisia Munisipiu Baukau, suspeitu nain rua deklara, sira nain rua foti kilat manu refere husi sidadaun inisial AC no faan ba sidadaun sira neebe iha interese, maibe parte Komando Polisia Munisipiu Baukau liu husi Servisu Investigasaun Kriminal aprezenta ona kazu ba Ministeriu Publiku ho Nuc 0058/BCIC no sei buka tuir sidadaun AC neebe konsidera nain ba faan kilta manu.
“Sira nain rua nia esplikasaun katak, foti husi ema ida nain ba sasan nee inisial AC pardeiru iha hela Baukau, nunee ita mos husu mandadu ba prokurador, nunee ita buka tuir autor lo-loos,” João Sancho Pires akresenta.
Komadante Polisia Munisipiu Baukau nee deklara, kazu refere kontra lei Nu.05/2017 kona-ba armas brankas, tanba material refere bele fo prezuiju ba ema nia vida, nunee Komando Polisia Baukau kontinua husu parte Prokurador Jeral atu fo mandadu ba sidadaun inisial AC neebe konsidera nain lo-loos ba kilat manu refere.
No Komando Polisia Munisipiu Baukau kontinua servisu makaas buka tuir kilat manu sira, tanba sasan refere bele fo prejuizu ba ema nia vida, nunee husu entidades hotu atu koopera ho parte polisia atu haree asuntu refere.
Enkuantu suspeitu inisial IF no RS hafoin aprezenta ba Ministeriu Publiku iha loron 30 Julhu nee.
(tom)
