DILI, STLTIMORLESTE.com – Okupantes neebe mak daudaun nee hela iha areador Eskola nu. 4 Setembru Balide, sira seidauk simu karta notifikasaun husi parte relevante.
Asuntu nee hatoo husi Diretor Eskola Sekundariu Jeral nu. 4 Setembru Balide, Sergio A. da Cruz ba jornalista STL iha nia knaar fatin Balide, Kinta nee (31/07/2025.
“Ita nian komunidade hirak neebe mak daudaun nee hela iha areador eskola ida nee seidauk hetan karta notifikasaun husi parte relevante sira, maibe informasaun antes nee husi edukasaun mak bele haree, uma kain tolu no xefe familia mak hamutuk nain 6, durante nee husi Edukasaun Munisipiu Dili mos mai hatoo ona ba ita nia komunidade sira nee, inklui husi parte munisipiu nian mos mai hatoo ba sira,” tenik nia.
Diretor ESJ nee hatutan, okupantes sira nee prontu koopera ho parte relevante sira, maibe sira nian ezijensia mak husu governu atu ajuda sira kona-ba kalen ba diretor eskola, maibe fo resposta deit ba komunidade sira nee katak, ida nee governu mak hatene.
“Difikuldade neebe mak ami enfrenta mak bainhira prosesu aprendizajen lao hela iha areador eskola nian, han fali iha turma oin, dala ruma tama too iha turma laran, depois sasan eskola nian la seguru ho diak,” nia haktuir.
Iha fatin seluk, Cesarina Correia Guterres nuudar Superintendente Edukasaun Munisipiu Dili hatete, EBC Bidau Akaderuhun okupantes sira simu ona notifikasaun iha dia 15 Julhu liu ba, hein atu sai deit ona. Bidau Akaderuhun uma kain 8, ESJ 4 Setembru seidauk.
(jac)
