BAUKAU, STLTIMORLESTE.com – Ema deskonhesidu harahun vidru hamutuk unidade 200 resin iha janela Eskola Ensinu Baziku Sentral (EBC – sigla português), Postu Administrativu Baukau Vila, Munisipiu Baukau.
Diretor Eskola EBC Vila Nova, Francisco Pinto hateten, estragus refere asaun kria husi ema deskonhesidu liu husi tuda iha tempu kalan hodi harahun vidru janela eskola hamutuk unidade 200 resin.
“Eskola nee hamutuk sala 14, maibe ami seidauk sura nia total, nee kala too 200 hanesan nee nakfera hotu, ema mak tuda iha tempu kalan,” hateten Francisco ba jornalista sira iha knaar fatin Vila Nova, Baukau, Kinta (31/07/2025).
Nia sublina, asaun refere la rezulta sasan seluk hetan estragus, aleinde husi vidru sira no kazu refere aprezenta ona parte Polisia Munisipiu Baukau.
Hatan ba kestaun nee, Komadante Komando Polisia Munisipiu Baukau, Superintendente João Sancho Pires hateten, ba kazu refere parte Polisia Eskuadra Postu Baukau Vila rejistu ona no sei halo investigasaun klean liu husi foti informsaun husi komunidade hela besik areadores eskola, tanba asaun refere kria husi ema deskonhesidu no halo iha tempu kalan.
“Ita nia prosesu Investigasaun sei lao hela, ita sei buka hela, tanba iha tempu kalan, ita tenta ema sira neebe hela besik fo informasaun klaru para ita buka, laos ema hela besik deit, maibe mestri sira mos fo no agora daudaun kazu nee rejistu iha Eskuadra Baukau Vila ita kontinua prosesu hela,” katak João Sancho Pires.
Enkuantu kazu harahun vidru janela EBC Vila Nova nee akontese kedas iha tinan 2011 too 2021 no tuir observasaun STL nian iha terenu nota katak, vidru janela eskola neebe ema deskonhesidu harahun parte eskola seidauk halo manutensaun.
Entretantu total estudante iha EBC Vila Nova Baukau hamutuk 705 kompostu setimu anu no nonu anu ho total profesores permanente nain 40.
(tom)
