DILI, STLTIMORLESTE.com – Ministru Interior (MI), Francisco da Costa Guterres apela ba povu tomak iha Timor Leste atu hametin pas no fo kontribuisaun ba seguransa, tanba jere seguransa no pas iha rai doben Timor Leste nuudar responsabilidade Timoroan hotu nian.
Ministru Interior hatoo mensajen ida nee liu husi Porta Voz Seguransa Ministeriu Interior, Superintendente Polisia, João Belo dos Reis iha konferensia imprensa semanal neebe halao iha Edifisiu Ministeriu Interior, Kaikoli, Dili, Kinta (31/7/2025).
Ministru Interior mos dehan katak, seguransa pas no trankuilidade iha rai laran Timoroan hotu nia responsabilidade koletivu, nunee ema hotu bele hetan rezultadu diak liu husi kolaborasaun neebe efetivu, ema hotu hola parte iha vijilansia, informa ba autoridade polisia kona ba relasionadu ho krime no seguransa.
Ministru Interior, Francisco da Costa Guterres mos apresia tebes sentidu kolaborativu neebe komunidade sira hatudu ona iha tempu kotuk, tanba nee husu agora mai oin, atu kontinua halo parte iha promosaun seguransa ho espiritu solidaridade hodi garante pas no tranquilidade liu husi dialogu, kolaborasaun no responsabilidade neebe ema hotu kontribui hodi sustenta kultura ida neebe respeitu malu ho hakribi violensia.
Mensajen ikus nian, Ministru Francisco da Costa Guterres husu ba povu tomak atu hola parte iha solusaun ba problema, Timoroan hotu mak garantidor ba futuru Timor Leste neebe diak liu.
Antes nee, Vise Primeiru Ministru no Ministru Koordenador Asuntu Ekonomia no Ministru Turismu no Ambiente, Francisco Kalbuadi Lay liu husi programa Meet The Press ba Edisaun VII ho topiku “Desempenho Do IX Governo, Em Dois Anos Governacao” iha Salaun Ministeriu Transporte Komunikasaun (MTK) Kaikoli, Dili, Tersa (29/7/2025) liu ba hatete katak Governu garante estabilidade politika no governativa durante mandatu tinan rua ho lideransa ida neebe forte, liuhosi vontade povu neebe espresa liuhosi eleisaun parlamentar tinan 2023 liu ba. Koligasaun CNRT-PD nia misaun hametin governasaun, fo estabilidade politika no kontuinidade ba politika publika sira.
“Iha tinan rua mandatu IX Governu Konstitusional halo buat barak importante. Iha difikuldade no desafius oioin, maibe mos iha progresu. Governu nia objetivu klaru, hadia povu nia moris, hadia Governasaun no garante dezenvolvimentu ho justisa,” hatete Francisco Lay.
(mik)
