DILI, STLTIMORLESTE.com – Oras nee daudaun uniforme nasional sei iha dalan, bainhira too mai parte eskola sei entrega ba estudantes sira.
Lia hirak nee hatoo husi Direitor Eskola Sekundariu Jeral (ESJ) nu. 4 Setembru Balide, Sergio A. da Cruz ba jornalista STL iha nia knaar fatin Balide, Sesta nee (01/08/2025).
“Kona-ba uniforme nasional ba ita nian estudantes sira dadaun prosesu iha dalan ona, bainhira farda too Timor mak husi parte eskola bele fahe ba ita nian estudantes sira, nee duni ami nian farda nasional ba estudantes nee iha ona, tanba ita nian estudantes sira tenke uza uniforme nasional,” nia informa.
Entretantu Diretor Ensinu Baziku Sentral (EBC – sigla português) Manleuana, Carlos Correia hatete, farda iha oin rua, ida kona-ba desportu nian no ida seluk mak uniforme nee, ida uniforme nee inan aman hatama osan US$ 15, nee ba estudantes EBC no estudantes EBF US$ 14, farda desportu kada estudantes inan aman hatama osan US$ 10, EBC Manleuana iha ninia EBF tolu.
“Kona-ba uniforme nasional nee agora ami sei feriadu hela, bainhira tama fali eskola ami hahu halo ona lansamentu uniforme nasional, tanba ami nian uniforme nee ami prepara tiha ona, ami sei konvida Diretor Edukasaun Munisipiu, nunee mos Diretor Jeral bele mai partisipa iha ami nian lansamentu uniforme,” nia informa.
(jac)
