DILI, STLTIMORLESTE.com – Profesores nain 5 neebe hanorin materia português iha Eskola Sekundariu Jeral (ESJ) nu. 4 Setembru Balide tama reforma obrigatoriu iha tinan oin.
Liafuan nee hatoo husi Diretor Eskola Sekundariu Jeral nu. 4 Setembru Balide, Sergio A. da Cruz ba jornalista STL iha nia knaar fatin Balide, Sesta nee (01/08/2025).
“Agora daudaun ami nian profesores sira sufisiente hela, maibe profesores nain 5 mak tama iha idade reforma ninia, sira nian idade 65 sae ba leten, sira la hatama karta rekerimentu ida, sira nain 5 nee hanorin materia português. Ami nian profesores moras laiha no idade reforma nian mak ohin hau temi ona nee, iha nain 5 neebe tama iha reforma obrigatoriu iha tinan oin,” dehan nia
Sergio.
Nia akresenta, profesores nain 5 neebe mensiona nee iha tinan 2026 sira tama iha reforma obrigatoriu ninia, tanba daudaun nee Ministeriu Edukasaun loke hela vaga, liu-liu sira neebe pasa iha bolsa nee bele koloka mai eskola neebe menus profesores no subtitui fali profesores reforma.
Iha parte seluk Diretor Rekursu Umanu Nasional iha MinisteriuEdukasaun, João Amaral hatete, profesores sira nian karta rekerimentu nee rekere ba iha SEM, depois mak husi SEM submete mai iha rekursu umanu nasional, tanba nee kada loron nee numeru profesores neebe hakarak atu reforma lori sira nian karta rekerimentu nee sempre aumenta, nee ho profesores idade 60 ba leten sira nee.
“Ita nian profesores reforma sira nee, ida neebe mak sira nain lori mai Karta rekerimentu nee, tama ona ba idade reforma, tuir lei obrigatoriu nee ita iha 1.456, nee la presiza sira hatama pedidu, maibe nee otomatikamente, ida neebe mak hanesan idade 60 ba leten sira hakarak reforma nee, nee laiha problema ida, sira bele hatama karta rekerimentu, tanba agora daudaun ami prosesu hela tuir sira nian rekerimentu sira nee, no sira lori mai nee ita prosesu ona,” nia esplika.
(jac)
