DILI, STLTIMORLESTE.com – Kargu Diresaun no Xefia Provedor Direitus Humanus no Justisa (PDHJ) nain 10 simu pose, hodi halao knaar ba pozisaun sira neebe iha.
“Sira nain 10 nee sira nain 8 maioria ema tuan servisu iha neeba ona no iha esperiensia kona-ba kargu sira nee, kontinua proativu liu tan halao sira nia knaar, hodi responde ba metas sira neebe iha,” dehan Provedor Virgilio da Silva Guterres ba jornalista sira iha Salaun Konferensia Sentru Nasional Chega Balide, Dili, Sesta (01/08/2025).
Provedor hatutan, PDHJ deside hamutuk ona ho planu estratejiku neebe halo iha 2024 no 2028 nian. Ba delegasaun Teritorial Maliana no Inspetor PDHJ nian foun, fiar sira nain rua iha esperiensia naruk iha entidade seluk, fiar katak sira sei la presiza tempu naruk hodi halo adaptasaun, sei fo kontribuisaun.
Nunee liu-liu iha parte auditoria nian atu haree kona-ba diresaun no departamentu sira seluk, halao sira nia funsaun diak ka lae.no prosedimentu entidade utiliza finansiamentu orsamentu neebe aloka ba tuir prosedimentu sira nee ka lae.
Virgilio esplika, tuir vaga neebe iha ba sira nain 16, maibe iha nain 10 hetan ona maibe nain neen mak seidauk, planu tempu badak no termu referensia iha hela atu loke fila fali konkursu bele kompleta pozisaun sira neebe sei mamuk.
Reforsa, pozisaun sira neebe sei mamuk mak hanesan.Diresaun Investigasaun Rekursu Umanu Xefi Departamentu Finansas, Delegasaun Teritorial Same, Oekusi no Baukau, atu molok mandatu PDHJ nian termina bele prienxe hotu ona pozisaun sira nee no rekruta mos pontu vokal nain 6 neebe antes nee sira planu ona.
Hatan kona-ba pozisaun sira neebe mamuk bele prejudika servisu ka lae, Provedor dehan la iha tanba durante nee funsiona hela tuir rejime funsaun publiku bolu dehan nomeasaun por substituisaun, tanba nee ema sira neebe iha Provedor bele nomeia hela hodi subtitui pozisaun sira nee, ema nomeia hotu ona ba pozisaun sira nee.
Hanesan Same nian, Diretora Same tuir la liu, maibe kontinua hetan nomeasaun kontinua lidera, maibe kona-ba Baukau nian delegasaun Teritorial liu ba iha Diresaun seluk tenke mai fali Dili, tanba nee nomeia ona ema seluk atu ba substitui iha neeba nomeasaun lao tiha ona.
Reforsa tan, ida nee selesaun por meritu, loke ba funsionariu publiku hotu iha internu, hanesan Funsionariu Publiku husi Diresaun hotu bele tuir, tanba nee foun husi pozisaun Maliana nian ema husi liur no Inspetor husi liur mak ba konkursu interna ba funsionariu publiku hotu.
Iha fatin hanesan, Komisaria Komisaun Funsaun Publika, Anita Tavares Olivera de Jesus dehan, husu emposadu sira atu halao servisu tuir regra neebe iha.
“Esperansa mak atu halao servisu tuir regra neebe iha, no mos hakruk ba regulamentu sira neebe iha,” dehan nia.
Nia hatutan, knaar neebe simu laos hanesan oportunidade, maibe hanesan responsabilidade ida hodi tau iha kabas atu halao servisu neebe iha.
(ter)
