DILI, STLTIMORLESTE.com – Relasiona ho informasaun neebe espalha kona-ba aktu balu nee halo husi autor judisiariu hasoru feto joven ida, Provedor Direitu Humanus no Justisa (PDHJ) sente triste haree akontesimentu nee.
“Maibe ba kestaun ida nee pesoalmente hau triste, tanba envolve ita nia ema sira neebe ita fiar iha setor justisa nian no ida nee hatudu no halo foer setor justisa nia imajen,” dehan Provedor Virgilio da Silva Guterres ba jornalista sira iha Salaun Konferensia Sentru Nasional Chega Balide, Dili, Sesta (01/08/2025).
Nia hatutan, hein katak maluk sira iha setor justisa sei buka meius atu restaura imajen setor justisa nian ba publiku, atu nunee ema ida rua nia sala la hamonu ita nia setor justisa nia integridade.
Nia sublina, laran triste haree no rona ida nee liu-liu envolve entidade ida neebe publiku dala barak kazu barak tau fiar ba setor justisa nian, sente triste tebes, hein katak vitima parte neebe prejudikadu iha liberdade natoon iha asesu natoon atu buka oinsa hetan justisa ba asuntu ida nee.
Dehan tan, iha konhesimentu kona-ba ida nee tanba kolega husi vitima nian ba informa kona-ba situasaun ida nee. No buat neebe akompanha mak iha tendensia atu halo alin feto neebe hatoo keixa atu sai fali vitima iha media sosial.
Provedor reforsa, husu atu publiku buka hatene informasaun lo-loos, maibe informasaun atu lo-loos hanusa ita hotu tenke too konkordansia ida katak, la tolera ofisial publiku sira uza fasilidade publiku hodi halo violasaun ka halo buat neebe tuir sira nia hakarak.
Dehan tan, labele uza kareta publiku no fasilidade publiku ba ita nia interese pesoal. Kona-ba se mak los no se mak sala Tribunal mak deside, importante mak kontinua konsidera prejunsaun inosensia.
Antes nee Advogada JU,S, Adelina Meluk deklara katak, sira hatoo ona pedidu balu ba iha Konselhu Superior Ministeriu Publiku kona-ba kestaun nee.
Tuir Adelina, pedidu nee sira hatama iha loron 2 fulan Julhu no sira mos husu atu konselhu foti sasan ruma hasoru autor judisariu refere.
(ter)
