BAUKAU, STLTIMORLESTE.com – Relasiona aniversariu FALINTIL – Forsa Defeza Timor Leste (F-FDTL) ba dala 50, F-FDTL konstrui ona uma ba Familia Herman Misa no Olinda Monteiro neebe durante tinan naruk aguenta nesesidade moris nian liu husi hili agua mamuk iha estrada ninin sidade Baukau.
Familia vulnerável nee laos imajen foun ba sidadaun Baukau oan sira inklui sidadaun sira husi munisipiu seluk no husi nasaun seluk neebe halo ona viajen ba sidade Baukau. Sira nia hela fatin iha Vila Nova besik edifisiu Eletrisidade Timor Leste Munisipiu Baukau.
Laos ona buat foun ba ita atu konhese no hatene klean liu tan familia nee, tanba liu husi entervista barak mak jornalista sira husi media nasional no media munisipiu partilha ona kona-ba inan Olinda Monteiro ho nia familia sira atividade kada loron nian hodi sustenta sira nia ekonomia familia.
Inan Olinda Monteiro hateten, tinan naruk ona hili agua mamuk iha sidade Baukau, tanba laen kaben Hermen Misa moras iha tinan hirak liu ba. Daudaun laen kaben Hermen Misa iha deit uma nunee inan Olinda Monteiro halao atividade hanesan hili agua mamuk iha estrada ninin sira husi Vila Nova too Vila Antiga hodi kontinua ba faan iha merkadu nunee bele hetan sentavus oan ida troka foos haknauk sira ba aguenta moris nian.
Olinda sublina, rendimentu neebe nia hetan la sufisiente atu hatan ba nesesidade seluk hanesan halo uma no haree oan sira nia eskola, tanba nee pasiensia hela uma neebe kondisaun aat no hapara oan sira nia eskola iha prosesu aprendizajen.
“Hili agua nee hau nia oan sira nee sei kiik kedas, ami hili agua faan mak sosa foos haknauk sira nee han. Semana ida faan US$ 3.00 sira labele eskola, tanba osan laiha” Olinda Monteiro konta ba STL hafoin seremonia lansamentu fatuk dahuluk ba nia uma iha area Vila Nova, Suku Tirilolo, Postu Administrativu Baukau Vila, Munisipiu Baukau, Sesta (01/08/2025).
Inan Olinda Monteiro ho nia feen kaben Hermen Misa iha oan nain 3 ho naran Afebi, Atino no Aseti nee mak kada loron ajuda inan Olinda Monteiro hili agua no daudaun la eskola, tanba kestaun finanseiru, maibe agradese, tanba bele hetan konstrusaun uma foun husi F-FDTL.
Xefe Suku Tirilolo, Elvino Belo reforsa, familia Herman Misa no Olinda Monteiro durante nee moris kbiit laek tebes neebe ema hotu iha Baukau asiste sira nia moris, tanba kada loron tuir estrada hili agua mamuk hodi sustenta moris loro-loron nian.
Kondisaun moris neebe familia Olinda no Herman infrenta, solidariedade Autoridade Suku Tirilolo nian iha fulan Fevereiru tinan nee liu husi diriji karta ba Autoridade Postu Baukau Vila no kontinua ba Autoridade Munisipiu Baukau, husu atu tulun familia vuneravel nee, maibe realidade hatudu iha loron 01 Agostu nee lansa ona fatun dahuluk ba konstrusaun uma ba familia vuneravel refere.
“Realidade ohin ita lansamentu ona uma ba ita nia inan no aman benefisiariu ba uma ida nee, hau agradese ba Forsa Defeza Timor Leste neebe konstrui uma ba hau nia komunidade neebe kbiit laek iha Suku ida nee,” Elvino espresa iha fatin serimonia lansamentu fatuk dahuluk.
Prezidente Autoridade Munisipiu Baukau, Veneranda Lemos konsidera, asaun neebe F-FDTL halo nuudar grasa Maromak nian, tanba nee presiza reza nafatin ba Institusaun Estadu Timor Leste neebe eziste, nunee kontinua tau matan ba maluk sira neebe sei presiza tulun.
“Uma nee kuandu hamrik ama ho oan sira uza nee uma ho didiak. Ita agradese ba eroi no eroina sira defende ita nia rai oferese ba ita ukun rasik aan atu ita hotu goza,” tenik Veneranda
Autoridade Munisipiu Baukau nee salienta, mezmu estrutura Governu estabelese liman ain too iha baze, maibe seidauk kobre hotu, tanba nee agradese ba F-FDTL, neebe bele iha kolaborasaun no kooperasaun ajuda ona Governu ho neineik maibe beibeik sei hadia maluk vuneravel sira nia moris.
Xefe Estadu Maior F-FDTL Brigadeiru Jeneral José da Costa “Trix” hateten, F-FDTL ajuda konstrui uma ba familia vuneravel sira, tanba atual jere Institusaun F-FDTL mesak Komando mai husi ai-laran nian no tinan 2025 nee FALINTIL selebra ba dala 50 neebe sei kaer prisipiu rua husi rezistensia nian mak hanesan harii nasaun no seluk lori povu ba moris diak.
“Iha nee mak ami lansa objetivu moris diak nian nee hateten katak diresaun ida sivil militar nian nee fo hatene ba Ministeriu tomak karik FDTL ajuda sira fatin neebe deit, FDTL prontu nee mak objetivu ami lansa liu husi Ministeriu Defeza,” hateten Trix hafoin seremonia lansamentu fatuk dahuluk ba konstrusaun uma ba familia refere.
Nia sublina, fundu konstrusaun uma ba familia refere mai husi Ministeriu Defeza no F-FDTL implementa nuudar programa ida husi selebrasaun aniversariu ezistensia FALINTIL ba dala 50 iha tinan nee.
Nia fundamenta, aniversariu ezistensia FALINTIL ba Dala 50 nee, F-FDTL sei konstrui uma ba familia vuneravel sira iha territoriu nasional hamutuk unidade 50 ho tipu hanesan.
“Lema ida FALINTIL nian hakarak hau lakohi promete, maibe pratika sei hatudu, maibe sei iha,” Trix katak.
Planu ba futuru kontinua apoiu uma ba familia vuneravel sira, Xefe Estadu Maior F-FDTL Brigadeiru Jeneral José da Costa “Trix” lakohi promete, maibe pratika mak hatudu.
Entretantu uma neebe FALINTIL – Forsa Defeza Timor Leste atu konstrui ba benefisiariu Hermen Misa ho nia familia medida 9X10 kompostu kuartu toba fatin 3, varanda 1, kompleta ho sala vizita no han inklui konstrui dapur no fatin sanitariu iha liur.
(tom)
