DILI, STLTIMORLESTE.com – Komunidade sira neebe mak hela iha suku Fuiluro, Postu Administrativu Lautem, Munisipiu Lautém, 60% asesu hotu ona ba bee moos.
Lia hirak nee hatoo husi Filipe de Quintas hanesan Xefe Suku Fuiluru, Postu adminitrativu Lautem, Munisipiu Lautém ba jornalista STL liu husi telefone, Sesta (01/08/2025)
“Iha Suku Fuiluro 60% komunidade sira asesu hotu ona ba bee moos no balun mak seidauk tanba sei uja bee posu rasik, balun uza BTL nian, nee mak ohin loron povu Fuiluru nee bele moris, se bee laiha labele moris,” dehan Filipe.
Nian dehan, iha Aldeia Asalainunu mos programa PNDS implementa hotu, maibe foin daudaun Prezidente foun Donalt Trumd sae, nia orsamentu nee dada fila fali hotu ona,.maibe sira dehan sei implementa fila maibe bainhira mak implementa seidauk hatene.
“Kada uma kain hetan hotu bee moos, sira nee husi programa PNDS nia no mos foin lalais iha hau nian mandatu foin mak implementa iha aldeia ida Chaulutur mak iha neeba sira nia preokupasaun bee laiha nee mak ami implementa programa PNDS nee iha Aldeia Chaulutur neeba,” katak nia.
Iha fatin seluk, Xefe Suku Beloi, Adão da Costa Nunes dehan, bee moos iha Suku Beloi nee araska oituan, tanba komunidade maioria halo perfurasaun bee ba idak-idak nia uma, BTL mai haree ona no identifika ona fatin balun atu halo perfurasaun balun atu formese bee moos ba komunidade sira.
“Iha Atauro ekipa husi Autoridade sira halo konservasaun hodi halibur udan been, bele dehan katak bee nee balun mosu tan daudaun ona maibe iha futuru oin mai Atauro mos bee iha ona,” konta Adão liu husi telefone.
Nia tenik, bee moris nee mai husi Aldeia Berau mai too iha diresaun Aldeia Bikeli, husi Aldeia Marker mai para iha Arlo, husi Parte Bemasu Beloi nia mak uza bee matan ida, bee nee nalihun hela maibe ida nee mak fornese ba komunidade sira hodi uza.
“Agora ami halo konservasaun ba bee ida nee bele la sufisiente ona ba komunidade sira nunee BTL sira mos identifika ona fatin balun hodi halo perfurasaun bele aumenta tan bee nee hodi reforsa ba komunidade sira,” nia tenik.
Entretantu Margarida Menezes hanesan komunidade iha Suku Beloi afirma, bee neebe mak durante nee sira uza nee mai husi Aldeia Berau, ida nee bele sufisiente ona ba sira.
“Bee neebe mak oras nee daudaun ami uza nee mai husi Aldeia Berau, hau sente bee ida nee sufisiente ona mai ami hodi konsumu, maske oituan maibe bele responde ona ba ami nia nesesidade loron-loron nia, tanba bainhira bee laiha liu ita labele halo buat ida,” nia hakotu.
Entretantu total populasaun iha Suku Fuiluro humutuk 16.402,.Kompostu husi aldeia 11 mak hanesan Aldeia Central, Aldeia Kuluhun, Aldeia Bee Moris, Aldeia Iraara, Aldeia Lospala, Aldeia 30 Agusto, Aldeia Naroman, Aldeia Titilari, Aldeia Chaulutur no Aldeia Asalainuno.
(EST 1)
