DILI, STLTIMORLESTE.com – Konstrusaun Eskola Nobel da Paz ho andar ida sei finaliza iha fulan Setembru tinan nee, hodi entrega ba iha parte eskola.
Kestaun nee hatoo husi Fundador Eskola Nobel da Paz, Jeremias P. de Jesus ba jornalista STL iha nia knaar fatin, Tersa nee (05/08/2025).
“Ita nia airin mos cor hotu ona, hein para hada fali batako, maibe hela deit loron ida ou rua okos nee tan ita bele dehan parte okos nee remata ona, tanba hada tiha batako sei tau tan sinta leten ninia, depois tula tan besi, bolu kompanhia husi Australia nian bele mai cor ona, bainhira cor remata reboka nee semana rua nunee hotu ona,” nia informa.
Nia dehan, entre fulan Setembru tinan nee bele entrega ona ba eskola atu nunee estudantes sira bele uza sala nee ba iha ezame nasional, sala rua kusus ba kantor finansas, sala haat aumenta para estudantes sira uza ba prosesu ensinu aprendizajen.
“Ami nian konstrusaun ida uluk nee remata kleur ona no daudaun nee estudantes sira uza ba aprendizajen no konstrusaun segundu ninia nee mak agora daudaun sei lao hela, espera remata lalais atu nunee fulan Setembru finaliza konstrusaun hodi entrega mai iha parte eskola ninia, tanba agora hada hela batako,” katak nia.
Nunee mos Leonita Marques Nunes hanesan estudantes hatete, agora daudaun estudantes sira uza sala foun ho andar ida neebe remata ona konstrusaun nee no konstrusaun ida seluk agora sei lao hela.
“Ami nian sala foun neebe ami uza daudaun nee ho ninia fasilidade meza no kadeira sufisiente hela ba estudantes sira. Uluk ami uza sala neebe ninia kondisaun ladun diak, maibe agora ami agradese, tanba ami nian kondisaun sala diak ona para bele fasilita diak liu tan ami iha ensinu aprendizajen,” dehan nia.
(jac)
