DILI, STLTIMORLESTE.com – Inspetor Ensinu Sekundariu Jeral (ESJ) no Tekniku Vokasional (Tekvo) nain ida iha Servisu Edukasaun Munisipal (SEM) Manatuto seidauk simu transporte no uza rasik ninia transporte privadu halo monitorizasaun ba eskola sira.
Haktuir Diretor Servisu Edukasaun Munisipiu Manatuto, Patricio da Cruz Quintao ba jornalista STL liu husi telefon, Kuarta nee (06/08/2025).
“Agora ninia problema mak nee, se ita halo komparasaun ho uluk, agora inspetor nee ita bele dehan diak, tanba agora iha nain 10, pre eskolar iha nain 2. Se uluk ita halo komparasaun deit, ensinu baziku postu idak-idak, agora hanesan iha Laclo nee iha nain rua kedas, nee duni agora diak ona, uluk inspetor ba sekundariu jeral laiha, maibe agora iha nain 1, maibe problema ida mak ninia area kobertura nee luan,” nia informa.
Nia hatutan, inspetores sira nee simu transporte hotu ona, maibe inspetor ba sekundariu jeral no tekvo nian nain ida nee seidauk simu transporte no nia uza rasik ninia transporte privadu hodi bele halo monitorizasaun ba eskola sira, tanba inspetores hotu iha ona transporte, agora daudaun inspetores iha SEM Manatuto hamutuk 10, pre eskolar nain 2, ensinu baziku nain 7, sekundariu jeral no tekvo nian 1.
Iha parte seluk, Cesarina Correia Guterres nuudar Superintendente Edukasaun Munisipiu Dili hatete, inspetores 12 nee bele halo kontrolu ba eskola hirak neebe mak lokaliza iha Munisipiu Dili, tanba nain 12 nee sufisiente ona atu kontrola eskola hahu husi Nivel Edukasaun pre-eskolar, ensinu baziku, filial, tekvo no nibel ensinu sekundariu sira iha Munisipiu Dili.
(jac)
