BAUKAU, STLTIMORLESTE.com – Husi fulan Janeiru too inisiu fulan Agostu nee, Hospital Rejional Eduardo Ximenes (HoREX) Baukau rejistu pasiente HIV-SIDA hamutuk nain 46, maibe pasiente nain 3 daudaun ses aan husi tratamentu.
Konselhor HIV-SIDA iha HoREX Baukau, Enfermeiru Sabino Carvalho esplika, odamatan sala konsulta ba virus HIV-SIDA iha HoREX Baukau loke ba sidadaun hotu neebe prezisa atu konsulta saude ba moras hadaet no lahadaet, nunee husu ema hotu atu kontinua hakbesik aan ba fasilidade saude bainhira hetan sintoma HIV-SIDA nian, tanba daudaun nee kazu HIVSIDA iha Munisipiu Baukau aumenta makaas.
“Tuir kazu neebe mak ita nia Hospital Rejional Eduardo Ximenes durante husi janeiru too mai inisiu fulan Agosto nee hamutuk 46,” hateten Sabino ba jornalista sira iha nia knaar fatin HoREX Baukau, Kuarta (06/08/2025).
Nia sublina, husi kazu HIV-SIDA 46 nee pasiente sira husi Munisipiu Lautem nain 5, Manatuto nain 1, nain 1 transferesia husi Munisipiu Dili, enkuantu pasiente numeru restu nuudar Baukau oan, maibe iha pasiente nain 2 nuudar Baukau oan inklui ida transferensia husi Munisipiu Dili daudaun ses aan husi tratamentu rutina kuaze hahu husi fulan Abril too ohin loron.
Nia salienta, pasiente nain 3 neebe daudaun ses aan husi tratamentu rutina kompostu feto 1 no mane 2, enkuantu pasiente seluk daudaun kontinua halao tratamentu rutina liu husi simu aimoruk iha HoREX Baukau.
“Nain 3 nee deit mak drop out ou ses aan husi tratamentu, maibe seluk 43 nee hotu-hotu badinas foti aimoruk fulan fulan, tanba aimoruk sufisiente,” Sabino Carvalho akresenta.
Sabino karak, mezmu aimoruk ba moras refere iha HoREX Baukau sufisiente, maibe husu parte relevante neebe kombate moras HIVSIDA iha Timor Leste atu aumenta volume sensibilizasaun no deseminasaun prevensaun virus HIV-SIDA nian iha territoriu nasional liu liu iha Munisipiu Baukau, tanba liu husi rejistu pasiente HIV-SIDA kada fulan numeru aumenta, maibe pasiente balun ses aan husi tratamentu nee fo perigu ba sidadaun seluk.
Entretantu husi numeru pasiente HIV-SIDA nain 43 neebe durante ativu simu aimoruk iha HoREX Baukau ho idade 20 too 50 maioria idade reprodutivu.
(tom)
