DILI, STLTIMORLESTE.com – Prezidente Republika (PR), Jose Ramos Horta halo enkontru ho CEO Finder hodi diskute hamutuk atividade neebe kompanhia nee halo iha Timor Leste (TL).
Bainhira remata halo enkontru Damon Neaves, CEO Finder enerjia kompanhia mina iha Weste Australia ba jornalista iha Palasiu Prezidensial Nikolao Lobato, Bairo Pite, Kuarta (06/08/2025) hatete, objetivu hasoru Prezidente hodi koalia kona-ba atividade nebee kompanhia nee atu halo iha Timor Leste.
CEO hatete, objetivu ohin hasoru Prezidente Republika nee atu koalia kompanhia Finder enerjia nia planu ba oin nusa bele halo atividade nee lalais, nunee kampu mina nee bele produsaun iha tinan rua mai. Koalia mos kona-ba kompanhia nia komitmentu iha Timor, tanba kampu ida nee, kampu deskobre tiha ona iha tinan hirak liu ba husi operador seluk.
“Agora etapa ida mai nee atu dezenvolve no halo produsaun, neebe komitmentu kompanhia ida nee ba tempu naruk iha Timor, nee fahe ita nia opiniaun husi prespetiva kompanhia nunee alinamentu Governu ninian programa,” katak nia.
Nia hatete, Kampu Kuda Tasi ho Jahal, kampu ida 100% Timor nia area neebe ninia nain mak Timor Leste.
Aleinde nee nia hatete, ohin la koalia kona-ba tekniku nian, maibe ida nee atu dezenvolve duni, mina deskobre tiha ona, nia montante neebe iha nee komersial neebe atu halo produsaun.
“Maibe ohin diskusaun nee halai liu mak halo introdusaun no mos ba fahe ami nia ideia kona-ba ezistensia kompanhia iha Timor. Projetu nee deskobre tiha ona nee seidauk buka mina nee etapa ida explorasaun hotu ona, mina nee deskobre tiha ona husi atividade pasadu, mina nee ninia montante nee bele komersial,” katak nia.
Nia hatete, inisiu atu halo perfurasaun fura posu tolu atu ba halo produsaun nian, iha kampu naran Kuda Tasi ho Jahal neebe besik malu, kompanhia nia esperansa nee bele atinji planu nee lalais.
“Ita nia planu agora nee bele halo produsaun agora 25 bele 27 hanesan nee ita bele halo produsaun ona. Komparasaun Bayu Undang kampu neebe boot, ida nee ninia montante entermus ba rezervatoriu nee kiik US$ 22 milhaun barels hanesan nee, maibe ida nee hanesan buat neebe konfirmadu tiha ona,” katak nia.
Maibe iha potensialidade nunee iha atividade explorasaun, dentru area lisensa nian nee bele aumenta bainhira aumenta tan deskobre ninia montante nee bele aumenta, maibe ida agora daudaun koalia nee kampu rua boot Kuda Tasi ho Jahal nee ninia barel mak ohin temi nee. Ninia ekonomiku nee iha benefisiu ba kompanhia no mos ba Governu.
Nunee mos Prezidente Republika, Jose Ramos Horta suporta makaas ba atividade kompanhia nian, kompanhia nee iha area juridiku Timor Leste ninian, projetu nee iha tasi laran, mais iha area Timor Leste nian.
Projetu nee lao ba oin nia produsaun dahuluk, tanba ema hotu-hotu hatene Bayu Undang komesa para produsaun ona, ida nee hanesan produsaun dahuluk neebe iha Timor Leste nia territoriu.
(eme)
