DILI, STLTIMORLESTE.com – Ministru Ensinu Superior Siensia no Kultura (MESSK), Jose Honoroi Jeronimo hasoru Prezidente Republika, Jose Ramos Horta, diskute preparativu sira kona-ba simeira ba pas neebe sei realiza iha fulan Agostu tinan 2026.
Bainhira remata hasoru malu, Ministru Ensinu Superior Siensia no Kultura, Jose Honoroi Jeronimo ba jornalista sira iha Palasiu Prezidensial Nikolao Lobato, Bairo Pite, Kuarta (06/08/2025) hatete, nia mai enkontru tanba Prezidente Republika mak konvida Ministru Ensinu Superior Siensia no Kultura, mai ho asesor nain rua diskute ho Ekaterina Zagladina nia mos ema Nobel ba Pas ida, hamutuk Prezidente Republika, Kaza Sivil fahe hanoin ba malu oinsa halo simeira ida kona-ba pas iha Timor Leste.
“Sei konvida mos peritu sira neebe manan Nobel ba Pas atu mai Timor, liu-liu Nobel ba Pas neebe manan kona-ba siensia, Prezidente Republika koalia ida nee. Ensinu Superior Siensia no Kultura apoiu atividade Prezidente Republika nian atu implementa iha fulan Agostu 2026,” dehan Ministru Ensinu Superior Siensia no Kultura, Jose Honoroi.
Ministru dehan, diskusaun neebe halao ohin mak primeira vez Prezidente Republika husu atu ministeriu halo draft komisaun ida, tanba tuir Prezidente Republika nia haree tinan liu ba organiza seminariu internasional nee mos konvida Nobel ba Pas lao diak.
Iha biban nee Ministru mos koalia ho Prezidente Republika katak, Ensinu Superior Siensia no Kultura disponivel apoiu programa Prezidente Republika nian kona-ba simeira ba pas iha fulan Agostu 2026.
Iha enkontru nee Prezidente Republika, Jose Ramos Horta husu atu Ensinu Superior Siensia no Kultura reprezenta Governu atu organiza simeira nee, Prezidente Republika dehan, simeira nee sei halo entre ekipa Prezidente Republika ho Governu.
Maibe agora servisu todan neebe Ensinu Superior Siensia no Kultura tenke halo mak forma ekipa komisaun nunee bele hahu diskute, tanba Prezidente Republika sei konvida Premiadu Nobel ba Pas sira mai partisipa iha simeira neebe sei realiza iha Timor Leste.
(eme)
