BAUKAU, STLTIMORLESTE.com – Servisu Munisipal Saude Baukau submete ona naran funsionariu rejime espesial no rejime jeral neebe idade too ona 65 ba Ministeriu Saude (MS) atu solusiona.
Diretor Servisu Saude Munisipiu Baukau, Cristiano Cipriano Belo informa, tuir karta orientasaun husi Ministeriu Saude ba Servisu Saude Munisipiu Baukau identifika ona funsionariu rejime espesial sira no rejime jeral ho idade 65, no dadus hotu ba submete ona ba Ministeriu Saude atu solusiona.
“Hanesan hau hateten, funsionariu sira husi rejime espesial balun tama ona ba idade 65 hamutuk nain 13, husi 13 nee kategoria enfermeiru ho asisten enfermeira no enfermeira, funsionariu rejime jeral nain 5,” hateten Cristiano ba jornalista sira iha nia knaar fatin Tirilolo, Baukau, Sesta nee (08/08/2025).
Nia esplika, funsionariu rejime espesial nain 13 neebe idade tama ona ba 65, husi area servisu enfermeira nain 3 rejistu iha Servisu Saude Munisipiu nain 1, nain 1 iha Sentru Saude Tirilolo no nain 1 iha Postu Saude Buruma. Nunee funsionariu idade 65 husi area servisu asistente enfermeiru no enfermeira hamutuk nain 10, nain 1 iha Servisu Saude Munisipiu, nain 1 iha Sentru Saude Baguia, nain 2 iha Sentru Saude Kelikai, nain 4 iha Sentru Saude Tirilolo, nain 1 iha Sentru Saude Venilale no nain 1 iha Sentru Saude Uailili.
Nunee mos funsionariu rejime espesial nain 5 neebe idade 65 ba leten, nain 4 servisu iha Servisu Saude Munisipiu kompostu grau D nain 1, grau E nain 1, grau F nain 2 no nain 1 grau F iha Sentru Saude Venilale.
Nia argumentu, funsionariu rejime espesial no rejime jeral neebe Servisu Saude Munisipiu Baukau identifika no naran sira relata ona ba ministeriu, atu reforma ou lae nee kompetensia ministeriu, maibe hanesan dirijente Servisu Saude iha Munisipiu Baukau ezekuta deit orientasaun husi ministeriu.
“Hau la hateten sira nee atu reforma, mais sira nee idade 65 ona, efetivu ba servisu komesa menus, entaun ita presiza tau atensaun hodi nunee karik desizaun neebe mai ita tenke re-funsionariu hodi hadia diak liu tan kualidade servisu atende povu,” Cristiano akresenta.
Enkuantu funsionariu sira neebe daudaun halao servisu iha Servisu Munisipal Saude Baukau kompostu kategoria rua, ida funsionariu rejime espesial destaka husi MS mak hanesan mediku, enfermeira, parteira inklui tekniku aliadu, daudaun ativu servisu hamutuk nain 228, la inklui funsionariu sira ho idade 65, moras, kontinua estudu no funsionariu neebe destaka ona ba Hospital Rejional Eduardo Ximenes.
Iha rejime espesial nee mos MS kontratu ba pesoal saude kazuais hamutuk nain 133, kompostu husi mediku, parteira, infremeira, tekniku aliadu hodi prienxe fasilidade saude sira iha Sentru Saude 9 no Postu Saude 30 iha Munisipiu Baukau.
Aleinde nee mos funsionariu kategoria seluk hanesan funsionariu rejime jeral entrega ba Autoridade Munisipiu Baukau hamutuk nain 65 responsabiliza ba servisu motorista, limpezador, seguransa, administrasaun inkluidu servisu entri dadus iha Servisu Munisipal Saude Baukau. Aleinde mos Autoridade Munisipiu Baukau mos fo kontratu ba funsionaria kazuais hamutuk nain 24 daudaun apoiu servisu atendimentu saude ba komunidade sira iha Munisipiu Baukau.
(tom)
