DILI, STLTIMORLESTE.com – Prezidente Republika (PR), Jose Ramos Horta hatete, Timoroan halo negosiu presiza aprende husi Xina, labele taka dalan ba sira loke kios iha TL, tanba sira faan sasan baratu duke Timoroan neebe faan folin karun.
Prezidente Republika Jose Ramos Horta hatoo kestaun nee liu husi nia diskursu iha Salaun IOB, Fomento, Sesta (08/08/2025).
“Hau rona emprezarial balun hatete labele husik Xina loke kios, hau koalia ba ita hotu, Xina loke kios no loja, kuandu sira haree ema Timor laiha neeba, se mak beikten ba loke fali kios iha hurulala neeba, Xina sira mak ba loke iha neeba, Timoroan nunka ba, depois Timor mak loke kios o ba hola buat ruma folin sae makaas kedas, Prezidente mak ba sosa folin ho kios nee hotu folin sae makaas, depois hamnasa lae balun oin suar,” katak PR Horta.
Prezidente Republika hatete, Timoroan sira mak faan sasan dala ruma folin sae makaas no atende ema mos ho oin buis, la hanesan ho Xines sira, tanba nee agradese ba Xina sira bele mai faan iha Timor ho folin baratu.
“Hau agradese apa Xina sira mai Timor, tanba nee sapatu imi sosa nee 2 dolar, imi sosa sapatu Australia nia 100 dolar, tanba nee mak labarik kiik oan hotu uza sapatu tanba Xina sira, hau hatete imi aprende husi Xina, sira estuda merkadu mundial, sira hatene iha mundu pelumenus tuir milhoes pesoas merkadu pekativu, signifika 2 bilhoens nee sira nia inkam mak nee, badak los, entau sira produs ba merkadu ida 2 bilhoens, Xina laos iha Timor deit, iha eropa nakonu, Portugal mos nakonu,” dehan Prezidente Republika.
Prezidente Republika hatete, Xina laos faan iha Timor deit, maibe iha nasaun hotu-hotu no sira produs ba ema kiak sira iha eropa, ema kiak iha Argentina nomos nasaun seluk tan.
Timoroan presiza aprende husi Xina no servisu badinas, dader hader tuku 4 no tuku 5 komesa dasa rai, nia han oituan no mina ida etu maran, no hetan osan boot la sosa kedas kareta, maibe kontrator Timoroan ida hetan kontratu diak sosa kedas kareta foun ba pasiar iha Surabaya, ba komu isin iha Surabaya.
“Aprende mos ema sira kelikai nee, Laga mos badinas tebes, maibe Laga sira bosok ita aat los, Laga nee ami sosa ikan iha lecidere neeba ikan la hatene mai husi alor ka neebe sira sosa depois sira bosok tau tiha enber oan ida depois dehan foin mak kaer,” PR Hatete ho Hamnasa.
Aleinde nee sidadaun Kelikai oan sira bisnis hetan osan laos lao pasiar kedas iha rai liur, maibe investe ba nia oan sira iha area edukasaun, aleinde nee sidadaun Atsabe mos matenek tebes, maibe bosok ten mos barak.
“Xina Welcome to Timor Leste, Australia Welkome to Timor Leste, husik ema mai, husik sira mai ita aprende, tanba estranjeiru sira iha nee hanesan Banlades, Pakistaun, Indonezia, Filipina, sira la hein Governu nia ajuda, sira mak loke loja oan ruma loke restorante oan ruma, sira la hadau imi nia servisu, labele baruk ten, lakohi serbisu fo kulpa ba ema seluk,” hakotu PR.
(eme)
