DILI, STLTIMORLESTE.com – Violensia Domestika krimi Publiku, tanba nee se deit mak hasoru krimi refere labele tauk hodi hatoo keixa.
“Labele tauk hatoo keixa, tanba ida nee hanesan krimi publiku, maske ema neebe hasoru krimi nee lakohi hatoo keixa, maibe ema ruma haree bele hatoo keixa, prosesu lao ba oin,” dehan Jurista Jose Maria Gutrrres ba jornalista STL iha Kaikoli, Setta (08/08/2025).
Nia hatutan, ema balu seidauk iha konhesimentu kona-ba lei ViolensiaDomestika, tanba nee sira pratika aktu refere, maibe ema balu iha konhesimentu ba lei neebe iha sira tauk atu pratika krimi refere.
Nia hatete, husu atu inan sira neebe sofre violensia labele nonok deit, maibe koko koalia sai, tanba se husik deit sei la halo prevensaun iha futuru.
Jurista nee sujere atu ba oin presiza tan halo sosializasahn kona-ba lei Violensia Domestika too iha baze, atu ema hotu bele konsiente katak violensia nee la diak no aktu krimi.
Iha fatin ketak, Akademiku UNTL, Sebastião dos Santos dehan, inan barak mak seidauk barani koalia sai kona-ba krimi neebe sira hasoru.
“Ita haree inan barak mak seidauk barani koalia sai kona-ba krimi neebe sira hasoru, tanba nee fo hanoin ba inan sira labele nonok banhira hasoru violensia, maibe hatoo keixa ba iha polisia,” dehan nia.
Antes nee Juiz Administrador Tribunal Oekusi, Evanjelinho Belo dehan, oras nee daudaun Tribunal Oekusi, krimi neebe aas mak Violensia Domestika no kontra bandu.
“Krimi neebe aas mak Violensia Domestika no kontra bandu, tanba nee esforsu Juiz sira nian kontinua halao julgamentu hodi redus numeru neebe iha,” dhan nia.
Nia akresenta, pena neebe aplika ba iha krimi ViolensiaDomestika, tetu mos ho nia deklarasaun sira, tanba nee pena aplika tuir aktu neebe halo.
(ter)
