DILI, STLTIMORLESTE.com – Bainhira Timor Leste (TL), adere ba ASEAN, Ensinu Superior sira tenke prepara aan, liu-liu prepara rekursu umanu.
Liafuan nee haktuir husi Reitor Instituto Ciência Saúde (ICS), Leao Borges ba jornalista sira iha Eskola Sekundáriu Jeral FINANTIL, Tersa (12/08/2025).
“Bainhira atu adere ba iha ASEAN nee parte ida husi planu governu nian, nee maka ita TL nee agradese, tanba ita atu tama ba iha ASEAN nee. Karik la lori tempu naruk,nee parte pozitivu, agora nasaun balun dehan lori tempu naruk tama ba ASEAN, maibe ita la lori tempu naruk,ida nee parte pozitivu ida. Ida fali diak, maibe ita mos tenke prepara ita nian, liu-liu rekursu umanu,” dehan Leao.
Nia dehan, bainhira TL tama ona ba ASEAN nee sira mos livre iha parte ekonomia nian. Husi parte akademia nian haree katak,tenke prepara aan halo didiak, maibe tempu nee agora badak ona, tanba tuir planu governu iha Outubru formalmente sai membru ASEAN. Nee tenke simu realidade neebe mak iha, no tenke preparadu simu realidade ba aban bain rua ninia.
(jac)
