DILI, STLTIMORLESTE.com – Tinan oin Eskola Sekundariu Jeral Publiku hamutuk 24, manorin sira sei aplika hanorin uza eletronika ba estudantes iha sala de aula.
Diretor Nasional Ensinu Sekundariu iha Ministeriu Edukasaun (ME), Benjamin Gomes da Cruz Fernandes dehan, kona-ba prosesu atu sosa komputador ba eskola sekundariu 24 nee, agora daudaun iha ona aprovizionamentu ME nian.
“Tinan oin eskola 24 sei aplika hanorin uza eletronika, katak sei uza projetor hodi hanorin estudantes iha sala de aula, tanba nee tinan nee ita sosa komputador ba eskola 24 nee, tanba orsamentu nee iha ona. Nee duni ninia prosesu agora iha aprovizionamentu ona, kompanhia neebe mak manan nee hodi haree asuntu ida nee. Ami hein katak, molok tinan nee hotu sasan tenke too mai no kompanhia neebe manan sei ba instala eskola neebe ami mensiona,” dehan nia ba jornalista sira iha Eskola Sekundariu Jeral FINANTIL, Tersa (12/08/2025).
Nia akresenta, nee duni tinan oin eskola públiku nivel sekundariu 24 mak sei aplika hanorin uza eletronika iha sala laran, manorin sira la uza ona zis, maibe uza deit projetor, nee eskola públiku, maibe privadu nee haree etapa por etapa, tanba rezolve uluk públiku mak tuir fali eskola privadu sira.
(jac)
