DILI, STLTIMORLESTE.com – Ministeriu Edukasaun (ME) anunsia rezultadu provizoriu teste Bolsa Kandidatu Ensinu Sekundariu Jeral no Tekniku Vokasional ba 2025.
Prezidente Juri ba Rekrutamentu Bolsa Kandidatu Profesores, João Amaral iha Ministeriu Edukasaun dehan, objetivu husi komunikadu emprensa nee atu hatoo rezultadu provizoriu teste eletronika bolsa kandidatu Ensinu Sekundariu Jeral no Tekniku Vokasional 2025 nian neebe halao husi dia 19 Maiu too dia 17 Junhu 2025, iha edifisiu Komisaun Funsaun Publika, Kaikoli, Dili.
“Ida nee sei sai nuudar lista rezultadu provizoriu, tanba Ministeriu sei fo loron lima husi data fo sai lista provizoriu ba partisipante teste atu reklama valor sira. Lista final ba lugãr iha Bolsa de Candidatos sei omologa husi Ministra Edukasaun no publika iha Jornal da Repúblika, hanesan prevé iha artigu 40 husi regulamentu rekrutamentu,” dehan nia ba jornalista iha sala konferensia Ministeriu Edukasaun Vila Verde, Kinta nee (14/08/2025).
Tuir Prezidente Juri nee katak, bolsa kandidatus Ensinu Sekundáriu no Tekniku Vokasional nee loke ba lugares hamutuk 2,475 iha grupu rekrutamentu 12, konforme despaxu Ministerial 10/2025, de 21 de Março kona-ba abertura konkursu Bolsa Kandidatu Ensinu Sekundariu. Ministériu Edukasaun ho baze ba primeira alterasaun dekretu-lei Nú. 31/2023; Estatuto da Carreira Docente halao rekrutamentu Bolsa de Candidato Ensino Sekundariu no Tekniku Vokasional. Objetivu Jeral husi programa bolsa kandidatu konforme dekretu lei nee mak premite sistema edukativu ida neebe iha kapasidade responde lais no efetivu ba falta manorin ka asegura kontinuidade prosesu ensinu no aprendizajen.
“Tuir mai ami hatoo rezultadu seriasaun provizoriu pur grupu rekrutamentu ba teste eletronika bolsa de kandidatu Ensinu Sekundariu Jeral no Tekniku Vokasional, bazeia ba enkontru Jurí ba konkursu iha loron 4 Agostu 2025 deside hanesan tuir mai ne’e, husi lista provizóriu konkursu bolsa de kandidatus, partisipante teste hamutuk 1095, kompostu husi 470 feto no 625 mane mak tama iha lugares bolsa. Nomos lista eskluídu hamutuk 8,384 tanba hetan menus husi valor 60,” dehan nia.
Nua hatutan, rezultadu total partisipante teste neebe apovadu tama iha lista lugares kada grupu rekrutamentu mak hanesan tuir mai nee, ba grupu rekrutamentu lingua português e temas literatura e cultura, partisipante teste hamutuk 114 mak hetan valor 60 ba leten no tama ba lugar bolsa ba lingua português. Ba lingua tetun, partisipante teste hamutuk 21 mak hetan valor 60 ba leten, no tama ba lugar lingua tetun. Ba lingua inglês, partisipante teste hamutuk 40 mak hetan valor 60 ba leten no tama ba lugar lingua Inglês.
(jac)
