DILI, STLTIMORLESTE.com – Ohin marka kapítulu foun ida iha kooperasaun dezenvolvimentu Tailándia – Timor Leste, Ajénsia Kooperasaun Dezenvolvimentu Ekonómiku Nasaun Vizinhu sira nian (NEDA), Ministeriu Finansas (MF) Timor Leste, no Fundu Nasoens Unidas ba Populasaun (UNFPA), asina nota entendimentu ida no akordu ko-finansiamentu ba sentru Kuidadu emerjénsia obstétriku no neonatal-báziku (KemON-B) iha Baguia no Kelikai, Munisípiu Baukau.
Reprezentante Nasionál UNFPA, Navchaa Suren hatete, inisiativa ida nee laos deit kona-ba projeitu reabilitasaun.
“Ida nee investimentu ida neebe ba vida inan feto no bebe sira nian liu husi hametin kuidadus saude primariu iha área rural sira,” hatete Navchaa Suren liu husi nia diskursu iha Hotel Palm Springs Fatuhada, Kuarta (13/08/2025).
Nia esplika, iha fundu ho montante US$ 700,000 husi NEDA Tailandia sei finansia reabilitasaun Sentru KEmON-B iha Kelikai, melhoria Sentru BEmONC iha Baguia, no fornese ambulánsia multi-funsaun rua hodi tulun komunidade remotas sira ho servisu saude esensial sira.
Iha fatin hanesan Prezidente NEDA, Perames Vudthitornetiraks hateten, projetu KEmON-B marka inisiativa dezenvolvimentu dahuluk iha Timor Leste, inísiu ida ba parseria ida neebe promisor no serve hanesan portaun entrada ida ba kolaborasaun kle’an liu entre nasaun rua.
“Ami espera tebes katak inisiativa ida nee sei lori saude no bem-estar neebe diak liu ba inan no bebe sira, hametin servisu saúde seksuál no reprodutivu, no harii kapasidade duradoura iha sistema saude TL nian, Inan no bebe foin moris hotu-hotu merese oportunidade diak liu ba moris. Liu husi parsería ida nee Tailándia orgulhu atu hamriik hamutuk ho Timór Leste hodi harii futuru ida nee,’’ nia informa.
Nia hatutan, ba komunidade sira iha Baguia no Quelicai, neebe asesu ba kualidade kuidadus maternál no bebe foin moris sai dezafiu kleur ona, projetu nee promete partu neebe seguru liu, intervensaun emerjénsia ka komplikasaun iha tempu loloos, no inísiu moris neebe saudável liu ba labarik sira.
Nunee mos Visi Primeiru Ministru, Ministru Koordenadór ba Asuntu Sosiál, no Ministru Dezenvolvimentu Rurál no Abitasaun Komunitária, Mariano Assanami Sabino Lopes, hatoo agradese ba kooperasaun ida nee reflete amizade forte entre nasaun rua, nomos kompromisiu komun sira nian atu proteje inan no labarik sira entre sidadaun sira neebe vulneravel liu.
(jen)
