DILI, STLTIMORLESTE.com – Jurista Timoroan konsidera katak, numeru rekursu umanu iha setor justisa sei menus, tanba nee presiza aumenta hodi reforsa servisu iha setor justisa nian.
“Hau hanoin numeru rekursu umanu seidauk sufisiente, tanba ohin loron ita haree prosesu barak liu tiha, kompara ho autor sira neebe kaer prosesu numeru sei menus,” dehan Jurista Alexandre Corte Real ba jonalista STL iha Kaikoli, Sesta (15/08/2025).
Nia hatutan, banhira kuandu numeru rekursu umanu menus, nia kauza barak bele halo mos prosesu lao kleur, no ikus mai numeru pendente kontinua aumenta.
Tanba ohin loron rekursu umanu sira neebe remata eskola iha Universidade barak ona, maibe oinsa mak Sentru Formasaun Juridiku no Judisiariu kontinua loke konkursu atu estudante sira nee kompete. Maibe sujere atu kontinua investe ema neebe iha kapasidade diak, atu halao knar iha sektor justisa ho diak atu lori justisa ba ema hotu.
Maske numeru rekursu umanus sei menus, maibe apresia tanba ohin loron Juiz sira mesak Timoroan no espera ba oin bele iha tan Juiz Timoroan balu sai inspetor atu avalia servisu neebe iha, hodi hatudu katak iha mudansa ba setor justisa nian.
Antes nee Prezidente Asosiasaun Majislatura Judisial, Antoninho Gonsalves dehan, rekursu umanu menus maibe ho formadus sira neebe iha bele pasa iha ezame atu apoiu servisu Tribunal nian.
“Iha hela formadus nain 13 sira sei iha prosesu nia laran hela, ho esforsu neebe iha sira bele atinji objetivu hirak nee,” dehan nia.
Nia hatutan, formadus sira nee mesak Timoroan, espera ho kapasidade neebe sira iha ikus mai bele pasa iha ezame hodi halao knaar neebe iha.
(ter)
