BAUKAU, STLTIMORLESTE.com – Primeiru Ministru (PM), Kay Rala Xanana Gusmão ofisialmente lansa ona fatuk dahuluk ba konstrusaun irrigasaun Uatu-ua Modobuti iha Postu Administrativu Baukau Vila, Munisipiu Baukau.
Serimonia lansa fatuk dahuluk nee iha loron 16 Agostu 2025, halao iha Suku Samalari, Postu Baukau Vila, neebe Primeiru Ministru Kay Rala Xanana Gusmão hetan akompanhamentu husi Ministru Agrikultura Pekuaria Peskas no Floresta, Marcos da Cruz, SEKooms, SEPF, Prezidente Autoridade Munisipiu Vikeke, Prezidente Autoridade Munisipiu Baukau no entidades relevante seluk tan.
Lansamentu fatuk dahuluk ba projetu refere nuudar pasu signifikativu ba setor agrikultura nian hodi hadia produsaun ai-haan no moris diak ba komunidade agrukultor sira husi kompromisu hotu no kontinuidade ba progresu sustentabilidade iha Timor Leste, liu-liu iha Munisipiu Baukau.
Projetu irrigasaun refere sei konstrui distansia kilometru (Km) 32,596 metrus nia inisiu husi mota Uatu-ua, Suku Gariuai too Suku Seisal, Postu Baukau Vila, neebe sei kobre natar hektare hamutuk 1,294 kompostu natar sira husi Suku Gariuai, Uailili, Samalari, Builai, Buibau, Kaibada Makasae, Buruma no Seisal.
Projetu irrigasaun ho distansia Km 32,586 metrus nee, kompostu kanal ou bokadura rua, mak hanesan kanal parte liman karuk ho distansia km 18,192 metrus kobre natar hektare 595 no kanal liman loos distansia Km 14,404 metrus kobre natar hektare 699.
Projetu konstrusaun irigasaun Modobuti Uatu-ua nee ho numeru tenderizasaun 027/MAPPF-2024 responsabiliza husi kompanhia Internasional China Nuclear Industry-22 Construction CO.LTD ho valor orsamentu hamutuk US$ 22, 605,600.00 ba durasaun konstrusaun tinan tolu no konsultan Caturbina Guna Persada-Multimera Harapan (CGP-MMH) joint venture Amythas Consultant Unipessoal, Lda (Sub-Consultant).
(tom)
