BAUKAU, STLTIMORLESTE.com – Governu liu husi Ministeriu Agrikultura Pekuaria Peskas no Floresta (MAPPF) konstrui irrigasaun boot 8 iha territoriu nasional.
Ministru Agrukultura Pekuaria Peskas no Floresta, Marços da Cruz hateten, iha tempu Governu atual Konstrui ona irrigasaun sira mak hanesan, irrigasaun Galata iha Postu Administrativu Venilale neebe sei kobre natar hamutuk hektare 800 resin husi Postu Venilale rasik no Postu Ossu Munisipiu Vikeke balun inklui irrigasaun Laivai Lautem neebe daudaun atinji ona 95% tuir planu inaugura iha fulan Outubru 2025.
“Ba tinan ida nee planu IX Governu ho maun boot nia lideransa halo desizaun importante dezenvolve setor agrikultura tinan ida nee ita halo irrigasaun boot 8,” hateten Ministru Marços da Cruz liu husi nia diskursu hafoin remata serimonia lansamentu fatuk dahuluk ba konstrusaun irigasaun Uatu-ua Modobuti iha Samalari, Sabadu (16/08/2025).
Nia esplika, aleinde irrigasaun Galata no Laivai, iha tinan nee Governu mos konstrui ona irrigasaun Maliana 2 nia kobre natar hektare 1,400 neebe daudaun progresu fiziku 15%, irrigasaun Uatu-ua Modobuti lansa fatuk dahuluk iha loron 16 Agostu 2025 sei kobre natar hektare 1,294.
Nia sublina, irrigasaun sira neebe planu atu konstrui tan mak hanesan irrigasaun Fatumeta Vemasi, Irrabere Uatukarbau, Maukolo Zumalai, Betanu Manufahi, Fatuberliu Same no irrigasaun Laclo neebe sei lansa fatuk dahuluk iha tempu besik.
“Irrigasaun mak fator ida atu aumenta produsaun, tanba nee informa ba Primeiru Ministru kona-ba kolaborasaun, kontribuisaun, partisipasaun husi povu, povu kolaborativu tebes lao too ohin loron nee sira nia apoiu,” Marços relata ba PM Kay Rala Xanana Gusmão.
Ministru Marços katak, projetu konstrusaun irrigasaun neebe lao ona, tanba hetan kolaborasaun, kontribuisaun no partisipasaun husi komunidade sira hotu nomos entidades sira hanesan Autoridade Suku, Postu, Munisipiu inklui Veteranus sira.
Nunee nafatin husu entidades hotu koopera nafatin Governu hodi implementa projetu sira liu-liu konstrui irrigasaun hodi fornese bee ba natar hirak neebe abandona tinan barak, tanba la asesu bee.
Prezidente Autoridade Munisipiu Baukau, Veneranda Lemos hamutuk ho Autoridade Suku, Postu, Igreja no Kombatente Libertasaun Nasional agradese ba Governu neebe bele konstrui mega projetu ida tan iha Baukau, hanesan irrigasaun Uatu-ua Modobuti neebe sei fo benefisia direita ba komunidade agrikultores sira iha Postu Baukau Vila aumenta numeru agrikola.
“Konstrusaun irrigasaun nee ami fiar no sei hatudu ba Nasional katak, ami Baukau sei fo han ba ami nia aan rasik husi produtu lokal,” hateten Veneranda Lemos.
Prezidente Autoridade Munisipiu Baukau nee informa, durante nee natar barak iha Suku Seisal, Buruma, Samalari, Buibau, Kaibada Makasae abandona, tanba la asesu, maibe ho vontade Governu liu husi oreintasaun dereita Primeiru Ministru ba MAPPF konsege estabele projetu refere neebe sei rezolve povu nia halerik kona-ba ai-haan, tanba bele hamoris hikas natar neebe abandona tinan barak.
Tanba nee lideransa povu Baukau nee sei kontribui masimu hodi projetu refere finaliza tuir kontratu neebe selebra ona.
“Ami sei kontribui ba projetu ida nee too konstrusaun remata tuir nia tempu ho kualidade hodi fo moris ba agrikultores sira iha Baukau,” Veneranda fundamenta.
Fatin konstrusaun irrigasaun Uatu-ua Modobuti hanaran Uailesu Uailinu Lo-Misa neebe signifika lulik neebe aas liu no bee mota iha nee sulin husi foho mundu perdidu, Postu Administrativu Ossu, Munisipiu Vikeke, liu husi area Postu Venilale too Seisal, Postu Baukau Vila.
(tom)
