BAUKAU, STLTIMORLESTE.com – Primeiru Ministru (PM), Kay Rala Xanana Gusmão hateten, Ministru Agrikultura Pekuaria Peskas no Floresta, Marços da Cruz foti aan, maibe natar barak abandona.
Deklarasaun nee Primeiru Ministru Kay Rala Xanana Gusmão hateten, hafoin Ministru Marcos da Cruz remata aprezenta relatoriu kona-ba irrigasaun sira neebe iha territoriu nasional konstrui ona no balun planu atu konstrui tan.
“Buat neebe Ministru koalia ohin foti aan atu mate, foti aan loos, halo iha nee halo iha neeba, mais ita lao ba natar sira toba hotu,” hateten PM Kay Rala Xanana Gusmão hafoin ofisialmente lansa fatuk dahuluk ba konstrusaun irrigasaun Uatu-ua Modobuti iha mota Samalari Baukau Vila, Sabadu (16/08/2025).
Tuir Xefe Governu nee katak, Ministru Agrikultura Pekuaria Peskas no Floresta koalia foti aan, tanba lao haree ba natar sira balun abandona (toba), maibe Ministru hateten halo iha nee no iha neeba.
Nunee lansamentu fatuk dahuluk ba konstrusaun irrigasaun Uatu-ua Modobuti, PM Kay Rala Xanana Gusmão la fo agradese ba Ministru Agrukultura Pekuaria Peskas no Floresta.
“Hau la fo agradese ba Ministru Agrikultura, lae orsida nia foti aan aat liu, hau sei ba iha fatin fatin neebe nia ohin temi tiha ona iha ga lae? nia mate hau,” katak PM Kay Rala Xanana Gusmão.
Xefe Governu nee hateten, sei tun direita observa fatin irrigasaun sira neebe Ministru Agrikultura Pekuaria Peskas no Floresta temi mak hanesan irrigasaun Galata, Laivai Lautem no irrigasaun seluk tan neebe iha ona faze konstrusaun no seluk neebe planu sei konstrui mos iha tinan nee.
Liga asuntu nee no seluk tan, STL tenta konfirma direita Ministru Agrukultura Pekuaria Peskas no Floresta, maibe desliga la fo komentariu.
(tom)
