DILI, STLTIMORLESTE.com – Loron FALINTIL 20 Agostu hanesan loron neebe importante ba povu, tanba liu husi loron nee mak ema bele hatene inimigu invade Timor Leste iha tempu neeba.
“Loron ida nee importante atu hanoin hikas fali uluk ita nia rain nee ema invade, Forsa FALINTIL mak hanesan estrutura Militar hodi hasoru inimigu invade ita nia rain, no loron nee hanesan valor istoriku ida,” dehan Jurista Alexandre Corte Real ba jornalista STL iha Kaikoli, Dili, Kuarta (20/08/2025).
Tuir nia, hanesan sidadaun Timor se hadomi RDTL, tenke hadomi mos FALINTIL ho sira nia luta reprezenta povu nia liman no ain, tanba nee mak ohin loron Timor Leste bele hetan naroman no ukun aan, no husu povu atu bele festeza loron nee, tanba F-FDTL nee nia sentidu mai husi FALINTIL.
Jurista nee mos hatoo sentidu ba eroi sira neebe luta ba rai ida nee, balu mate ruin hetan no balu la hetan ho sira nia dedikasaun ohin loron Timor Leste bele hetan naroman.
Iha fatin ketak, Akademiku Universidade Nasional Timor Lorosae (UNTL), Rafael de Jesus dehan, loron ida nee sai hanesan loron istoriku, atu selebra hodi hanoin hikas kona ba Timoroan sira nebe mate ona hodi ikus mai Timor Leste hetan liberdade.
“Loron neebe importante tebes kada tinan ita kontinua selebra, hanesan loron ida neebe importante, oinsa atu bele konta tutan ba jerasaun foun sira konaba lutu ida nee,” dehan nia.
(ter)
