DILI, STLTIMORLESTE.com – Atu halao mudansa ba setor justisa tenke harii Tribunal iha Munisipiu hotu, atu nunee Juiz sira bele halao servisu ho diak, tanba durante nee ema sempre kestiona hela deit Juiz sira nia servisu.
“Atu halo mudansa diak liu tan, tenke estabelese Tribunal iha Munisipiu sira hotu, tanba Timoroan matenek iha area justisa barak ona, too tempu harii Tribunal iha Munisipiu hotu atu justisa bele lao ho lais, tanba se mantein deit iha Dili, Baukau, Suai no Oekusi hanesan akontese ona, prosesu barak mak sei pendente hela, dala ruma ho limitasaun distansia halo julgamentu sira nee la lao,” dehan Jurista Alexandre Corte Real ba jornalista STL iha Kaikoli, Dili, Kuarta (20/08/2025).
Nia hatutan, Tribunal haat nee tuir deit eransa Nasoins Unidas nee mak utiliza durante nee, tanba nee presiza kria tan Tribunal iha Munisipiu hotu, Estadu mos tenke tau orsamentu hodi forma infraestrutura rekursu umanu atu bele koloka iha teritoriu tomak nunee kazu bele rezolve lalais.
Tanba servisu iha setor justisa mudansa iha ona, maka halo rekrutamentu ba Juiz, Prokurador, Defensor Publiku no mos Advogadu Privadu. Parlamentu Nasional mos konsege halo mudansa ba iha Lei Organizasaun Judisiariu, depois halo lei kona ba ema Internasional bele mai servisu, maibe lei nee atu limita sira nia servisu iha area no lei nee determinadu loos, no la hadau Timoroan sira neebe servisu iha Justisa nia direitu sira mai kolabora ho area neebe Timoroan seidauk iha.
Iha fatin ketak, Jurista Jose Maria Guterres dehan, hari Tribunal iha Munisipiu hotu, sai hanesan pasu ida atu lori Justisa hakbesik ba iha komunidade sira. “Hau hanoin se hari Tribunal iha Munisipiu hotu sai hanesan pasu ida neebe diak, atu lori justisa hakbesik ba iha komunidade sira,” dehan nia.
Nia hatutan, ohin loron kazu balu pendente razaun balu mos tanba intervinente sira la mai ho distansia dook, tanba nee se hanoin hari Tribunal iha munisipiu hotu bele redus mos kazu pendente neebe iha.
Aleinde nee, Prezidente Tribunal Rekursu, Afonso Carmona deklara, tuir planu sei harii tan Tribunal iha Munisipiu haat. Hanesan Viquque, Ermera, Baucau nian atu hadia fali no mos Maliana.
Maibe haree ba orsmamentu neebe iha sei tau uluk prioridade ba iha Ermera no Malinana, depois maka ba fali Munisipiu sira seluk.
(ter)
