BAUKAU, STLTIMORLESTE.com – Sebastião Belo mate tanba hetan sona husi Subrinhu ho inisial A, tanba problema uma neebe matebian rasik konstrui hela.
Asidente nee akontese iha area Vila Nova, Suku Tirilolo, Postu Administrativu Baukau Vila, Munisipiu Baukau, iha loron 30 fulan Agostu tinan 2025.
Liu husi entrevista familia matebian, João Belo konta, Sebastião Belo mate tanba hetan sona husi inisial A nuudar subrinhu, tanba kestaun problema uma neebe matebian rasik konstrui.
“Sebastião Belo sona husi A, AR mak tebe nia ain monu tun A sona nia. Nia bin nia oan,” hateten João ba jornalista sira iha sala mortuariu HoREX Baukau, Sabadu (30/08/2025).
Iha fatin hanesan Sasin Francisco Xavier Belo “Galiria” haktuir, kronolojia ba asidente ka insidente nee antes matebian seidauk hetan sona husi A, matebian halo kontaktu ho sasin Francisco Xavier Belo.
“Antes sira rua seidauk oho malu nee matebian telefone hau dehan subrinhu kaer dima ho tudik atu oho hau no hanesan aman mos fo hanoin haruka tuur hakmatek hau sae ba telefone Polisia mak lori imi ba kantor Polisia, entuan hau tuir dalan tama sira antes sona malu nia tiu matebian ho subrinhu latan hamutuk nia subrinhu ida fali halai tiha ona,” haktuir Galiria.
Hafoin Francisco Xavier Belo too fatin matebian ho subrinhu latan hamutuk hela iha rai iha neebe subrinhu A kaer hela tudik no subrinhu ida seluk halai. Husi nee Francisco Xavier Belo transporta matebian ho subrinho A ba Hospital Rejional Eduardo Ximenes Baukau, tanba subrinhu A mos hetan kanek.
Aleinde nee Mediku iha sala emerjensia HoREX Baukau, Mario Sarmento dehan, matebian ho subrinhu neebe familia transporta ba sala emerjensia HoREX pur-volta tuku 09:00 resin neebe mediku sira atende, Sebastião Belo hetan sona iha parte oin laran, liman inklui hirus matan parte karuk neebe provaka raan sai barak rezulta mate fatin.
Nunee mos subrinhu hetan kanek iha parte kabun, tanba hetan sona ho nunee mediku sira submete kedas ba sala operasaun no daudaun baixa ona iha sala sirurjia HoREX Baukau.
Agora daudaun Matebian Sebastião Belo asegura ona iha sala mortuariu no tuir planu atu submete ba prosesu autopsia.
Entretantu tuir observasaun jornalista STL iha terenu haree katak, matebian Sebastião Belo nia mate isin rai hela iha sala mortuariu Hospital Rejional Eduardo Ximenes Baukau, hetan akompanhamentu husi família sira no parte Polisia Munisipiu Baukau.
Ho nunee notisia nee STL hatun seidauk hetan komentariu ruma husi Komadante Komando Polisia Munisipiu Baukau.
Jornalista: Tomas Reis
Editora: Carme Ximenes
